2027 jyly kommýnaldyq ınfraqurylymdy jańǵyrtýǵa 1,8 trln teńge baǵyttaý josparlanǵan
ASTANA. KAZINFORM- Qazaqstanda «Energetıkalyq jáne kommýnaldyq sektorlardy jańǵyrtý» ulttyq jobasy aıasynda 2027 jyly 1,8 trln teńge ınvestıtsııa tartý josparlanyp otyr. Onyń shamamen 1,3 trln teńgesin qaryz qarajaty esebinen tartý kózdelgen. Ekinshi deńgeıdegi bankter men Qazaqstannyń Damý banki arqyly qarjylandyrýǵa shamamen 400 mlrd teńge qarastyrylǵan.
Bul máseleler Almatyda Premer-mınıstrdiń orynbasary Qanat Bozymbaevtyń tóraǵalyǵymen ótken keńeste talqylandy.
Ulttyq jobany júzege asyrýǵa 2025–2029 jyldary shamamen 13 trln teńge ınvestıtsııa tartý kózdelgen. Onyń ishinde 6,8 trln teńge kommýnaldyq ınfraqurylymdy jańǵyrtýǵa baǵyttalady. Joba aıasynda 84 myń shaqyrymnan astam ınjenerlik jelini jańartý, olardyń ortasha tozý deńgeıin 40%-ǵa deıin tómendetý jáne nysandardaǵy apattylyq deńgeıin 25%-ǵa deıin qysqartý josparlanǵan.
Ótken jyldan bastap óńirlik jobalardy qarjylandyrý bastaldy. Bıyl túrli qarjylandyrý kózderinen keminde 1,1 trln teńge ınvestıtsııa tartý josparlanǵan.
Qarjy ınstıtýttary jalpy somasy 901,5 mlrd teńgeni quraıtyn jobalardy qarjylandyrý jóninde usynystar engizdi. Onyń ishinde 517,8 mlrd teńgege nesıelik jeliler ashyldy, al 383,8 mlrd teńge kólemindegi jobalar qaralý satysynda.
Jobalardy qarjylandyrýǵa ekinshi deńgeıdegi bankterdiń ishinen negizinen Qazaqstan Halyq banki men Bank TsentrKredıt belsendi qatysyp otyr. Jalpy quny shamamen 256 mlrd teńgeni quraıtyn, 20 tabıǵı monopolııa sýbektisiniń 138 jobasynan turatyn portfel qalyptastyryldy.
Keńes barysynda 2027 jyly elimizdiń 14 óńirinde júzege asyrylatyn 85 jobadan turatyn portfel de qaraldy.
Qarjylandyrýǵa qoljetimdilikti keńeıtý úshin «Damý» qorynyń qarjy quraldaryn paıdalaný jáne sýbsıdııalaý múmkindikteri qarastyrylyp jatyr. Shaǵyn jeke kommýnaldyq kásiporyndarǵa «Órleý» baǵdarlamasy aıasynda jyldyq syıaqy mólsherlemesi 12,6%, merzimi 10 jylǵa deıingi jeńildikti nesıe berý tetikterin qoldaný usynylyp otyr.
-Bizdiń mindetimiz – týyndaǵan jekelegen máselelerdi sheship qana qoıý emes, qarjylandyrý sharttaryn júıeli túrde jetildirý jáne uzaqmerzimdi ári jeńildikpen qarjylandyrýdy qamtamasyz etý, – dep atap ótti Qanat Bozymbaev.
Vıtse-premer ınfraqurylymdy jańǵyrtý boıynsha josparlanǵan jumystardyń tolyq kólemde oryndalýyn qamtamasyz etý úshin jobalardy nesıeleýge qatysatyn bankterdiń qataryn keńeıtý qajettigin aıtty.
Osyǵan baılanysty Ulttyq ekonomıka mınıstrligine kommýnaldyq kásiporyndardyń jeńildikpen qarjylandyrýǵa qoljetimdiligin keńeıtý maqsatynda qoldanystaǵy qarjylandyrý tetikterin ózgertý jóninde usynystar ázirleý tapsyryldy.
Tapsyrmalardyń oryndalýyn úılestirý Ulttyq ekonomıka mınıstrligi men ulttyq jobanyń qarjy operatory – «Báıterek» holdıngine júkteldi. Holdıngke memlekettik organdarmen jáne qarjy uıymdarymen birlesip, árbir jobanyń júzege asyrylý barysyna aı saıyn monıtorıng júrgizetin jumys tobyn qurý tapsyryldy.
Sonymen qatar holdıng banktermen birlesip, 2027 jyly tikeleı kredıtteýge jatatyn jobalardyń tizbesin usynýy kerek. Onda qarjylandyrý kólemi, sharttary jáne sheshim qabyldaý merzimderi kórsetilýge tıis.
Osyǵan deıin Qazaqstannyń ınfraqurylymdy jańǵyrtý arqyly ónerkásip kooperatsııasyn damytqaly otyrǵany týraly jazdyq.
