2027 jyly Qazaqstandaǵy 50 medıtsınalyq kolledj memlekettik attestattaýdan ótedi

ASTANA. KAZINFORM – 2027 jyldan bastap Qazaqstandaǵy medıtsınalyq kolledjderdiń jartysy memlekettik attestattaýdan ótedi. Komıssııalar oqý oryndaryna baryp, bilim berý sapasyn 10 baǵyt boıynsha baǵalaıdy, dep habarlaıdy QR Densaýlyq saqtaý mınıstrliginiń baspasóz qyzmeti.

2027 jyly Qazaqstandaǵy 50 medıtsınalyq kolledj memlekettik attestattaýdan ótedi
Foto: QR Densaýlyq saqtaý mınıstrligi

Orta býyn medıtsına mamandaryn daıarlaý sapasyna memlekettik baqylaýdy kúsheıtý maqsatynda 2026 jyly Densaýlyq saqtaý mınıstrligi alǵash ret tehnıkalyq jáne kásiptik, orta bilimnen keıingi bilim berý uıymdaryn memlekettik attestattaýdan ótkizý qaǵıdalaryn bekitti. Jańa tártip boıynsha kolledjderdi tikeleı baryp tekserý mindettelgen.

Bıyl attestattaýǵa tórt medıtsınalyq kolledj irikteldi. Onyń ekeýinde tekserý jumystary júrgizilip úlgerdi.

Kelesi jyly elimizdegi 50 medıtsınalyq kolledj memlekettik attestattaýdan ótedi. Kóshpeli tekserý kezinde olardyń materıaldyq-tehnıkalyq bazasy, oqý protsesiniń uıymdastyrylýy, sımýlıatsııalyq ortalyqtarynyń jabdyqtalýy jáne mamandar daıarlaý sapasy baǵalanady. Sondaı-aq bilim berý uıymdarynyń memlekettik jalpyǵa mindetti bilim berý standartyna sáıkestigi 10 baǵyt boıynsha tekseriledi.

Qazir Qazaqstanda 100 medıtsınalyq kolledj jumys isteıdi. Onyń 22-si – memlekettik oqý oryndary. Olar medıtsına kadrlaryn daıarlaýmen qatar, jekemenshik kolledjder úshin de sapa standarttaryn qalyptastyrýy tıis.

-Osy baǵytta oqý baǵdarlamalaryn mamandyqtardyń beıindik erekshelikterine saı qaıta qaraý, tehnıkalyq bazany jańartý jáne dýaldy bilim berý elementterin engizý kózdelgen. Sonymen qatar óndiristik praktıkadan ótý jáne memlekettik grant boıynsha oqý mindettemelerin óteý tásilderin ózgertý josparlanyp otyr,-delingen habarlamada.

Aıta keteıik, bıyl kolledjderge 133 myń stýdent qabyldanady.