2027 jyly Qazaqstanda 845 MVt jańa energetıkalyq qýat iske qosylmaq
ASTANA. KAZINFORM - Energetıka mınıstrligi eldi senimdi ári úzdiksiz energııamen qamtamasyz etý, generatsııalaý qýattaryn ulǵaıtý jáne qajetti elektr energııasy rezervin qalyptastyrý boıynsha júıeli jumysty jalǵastyryp keledi, dep habarlaıdy QR Energetıka mınıstrliginiń baspasóz qyzmeti.
Baspasóz qyzmetiniń málimetterine qaraǵanda, 2027 jyly Qazaqstanda 845 MVt jańa energetıkalyq qýatty iske qosý josparlanyp otyr. Atap aıtqanda, Jambyl GRES-inde jalpy qýaty 210 MVt bolatyn 5 gaztýrbınalyq qondyrǵyny, «MAEK» JShS-de qýaty 160 MVt bý-gaz qondyrǵysyn, «Baskýat Energoprom» JShS jobasynyń birinshi kezeńi aıasynda jalpy qýaty 34,7 MVt bolatyn 5 gazporshendi qondyrǵyny, sondaı-aq «Kazakhmys Energy» JShS-de qýaty 70 MVt bý-gaz qondyrǵysyn iske qosý kózdelgen.
Sonymen qatar, jalpy qýaty 570 MVt bolatyn jańartylatyn energııa kózderi jobalaryn iske asyrý josparlanǵan. Olardyń qatarynda Almaty oblysyndaǵy qýaty 100 MVt kún elektr stantsııasy, Qyzylorda oblysyndaǵy jalpy qýaty 70 MVt bolatyn úsh kún elektr stantsııasy, Aqtóbe oblysyndaǵy árqaısysynyń qýaty 100 MVt bolatyn eki jel elektr stantsııasy, Qyzylorda oblysyndaǵy qýaty 50 MVt jel elektr stantsııasy, Túrkistan oblysyndaǵy qýaty 50 MVt jel elektr stantsııasy jáne Abaı oblysyndaǵy jalpy qýaty 100 MVt bolatyn eki jel elektr stantsııasy bar.
-Jańa qýattardy iske qosý 2027 jyldyń birinshi toqsanynda eldiń elektr energııasyna degen qajettiligin óteýge múmkindik beredi. 2027 jyldyń sońyna qaraı elektr energııasynyń shamamen 1,3 mlrd kVt·saǵ kóleminde profıtsıti qalyptasady dep kútilip otyr,-delingen habarlamada.
Aıta keteıik, 2026 jyly Qazaqstanda shamamen 2,6 GVt jańa energetıkalyq qýatty iske qosý josparlanǵan. Atap aıtqanda, tórt gaz elektr stantsııasyn iske qosý, qoldanystaǵy eki elektr stantsııasyn keńeıtý, sondaı-aq jańartylatyn energııa kózderiniń 10 jańa nysanyn iske qosý kózdelgen.
Osyǵan deıin Almatyda qaldyqtardy energetıkalyq kádege jaratý jobasy qolǵa alynǵany týraly jazdyq.
