2027 jyly Qazaqstan men Qytaı arasynda temirjol arqyly júk tasymaly 100 mln tonnaǵa jetedi
ASTANA. KAZINFORM – Búgin elordada alǵash «Qazaqstan-Qytaı» kólik forýmy ótti.
- Byltyr eki el arasynda temirjol arqyly júk tasymaldaý 13%-ǵa ósip, 32 mln tonna boldy, bul qazir rekord bolyp tur. Bıyl «Dostyq-Moıynty» temirjolynyń ekinshi dálizi iske qosylǵan soń eki el arasyndaǵy temirjol qatynasynyń qýattylyǵy qazirgiden 62 mln tonnaǵa jetedi. Al 2027 jyldyń sońyna qaraı búkil jumysty aıaqtaǵan soń 100 mln tonnaǵa jetedi, - dedi Kólik mınıstri Marat Qarabaev elordada ótken «Qazaqstan – Qytaı» kólik forýmynan keıin BAQ ókilderiniń saýalyna jaýap bere otyryp.
Odan ári mınıstr eki el arasyndaǵy kólik qatynasy jaǵdaıyna toqtaldy.
- Buryn Qytaı kólikteri Qazaqstannyń ishine kire almaıtyn, kerisinshe bizdiń kólikterde kire almady. 2023 jyly Memleket basshysy Qasym-Jomart Toqaevtyń Qytaıǵa memlekettik sapar barysynda úkimetaralyq kelisimshartqa qol qoıyldy, sonyń arqasynda búginde eki el kólikteri emin-erkin qatynap jatyr jáne basqa elge óte alady. Sońǵy eki jyldyń ishinde Qytaıdan Qazaqstan arqyly kólik qatynasy tranzıti eki ese ulǵaıdy, - deıdi vedomstvo basshysy.
Aıta keteıik, alǵashqy kólik forýmyna Qazaqstan men Qytaıdyń kólik mınıstrleri Marat Qarabaev pen Lıý Veı qatysty.
Sondaı-aq atalǵan sharaǵa eki eldiń bıznes-qaýymdastyǵy men kólik-logıstıkalyq kompanııalarynyń 300-den astam ókili kelgen. Forým aıasynda B2B jáne G2B kezdesýler uıymdastyryldy. Forým aıasynda SPG Tsındao porttar toby men Qazaqstannyń Quryq porty arasynda memorandýmǵa qol qoıyldy.
Mamyrdyń basynda Qytaı-Qyrǵyzstan-Ózbekstan temirjolynyń qurylysy bastaldy.