2027 jyly Qazaqstan halqy 12 aýrý boıynsha tegin dıagnostıkadan óte alady
ASTANA. KAZINFORM – Densaýlyq saqtaý mınıstri Aqmaral Álnazarova Májiliste ótken brıfıngte tegin medıtsınalyq kómektiń kepildendirilgen kólemi aıasynda qandaı ózgerister engiziletinin aıtyp berdi.
Onyń aıtýynsha, qazir TMKKK aıasynda qazaqstandyqtar týberkýlez ben AITV/JITS sekildi eki áleýmettik mańyzdy aýrýǵa kúdik bolǵan jaǵdaıda konsýltatıvti-dıagnostıkalyq kómekti tegin ala alady.
– Bul tizimge dınamıkalyq baqylaýǵa jatatyn 12 áleýmettik mańyzdy jáne 22 sozylmaly aýrý kiredi. Biz MÁMS júıesin engizýde ozyq tájirıbeli elderdi zerttep, memlekettik bazalyq pakette bolýy tıis qyzmetter tizimin bólip aldyq. Bul bazalyq qyzmetter paketi dep atalatyn bolady, al odan basqa qyzmetter — saqtandyrý paketi retinde qarastyrylady, - dedi A.Álnazarova.
Mınıstr qazir osy tizimderdiń pysyqtalmaǵanyna baılanysty qarjy aǵyndarynyń durys bólinbeı jatqanyn atap ótti.
– Mysaly, TMKKK aıasynda onkologııalyq skrınıngtiń birinshi kezeńi qoljetimdi. Biraq ekinshi kezeńi tek saqtandyrylǵan patsıentter úshin ǵana qarastyrylǵan. Sondyqtan Memleket basshysynyń tapsyrmasy osy tizimderdi naqtylap, medıtsınalyq qyzmetterge, ásirese, dıagnostıkaǵa qoljetimdilikti qamtamasyz etýdi kózdeıdi. Jyl sońyna deıin onkologııalyq skrınıngter bir paketke – TMKKK paketine engiziledi. Sondaı-aq, áleýmettik mańyzdy aýrýlar qatarynda týberkýlez, AITV, gepatıt, ınfektsııa, onkologııa jáne sırek kezdesetin aýrýlar bar. Sondyqtan 12 áleýmettik mańyzdy aýrý boıynsha dıagnostıkany kezeń-kezeńimen 2027 jylǵa deıin bazalyq paketke qosý usynylady, bul onyń saqtandyrylǵan-saqtandyrylmaǵanyna qaramastan qoljetimdi bolýyn qamtamasyz etedi, - dep tolyqtyrdy Densaýlyq saqtaý mınıstri.
Búgin Májilis tóraǵasynyń orynbasary Danııa Espaeva Úkimet saǵatynda adamdardyń medıtsınalyq qyzmetterdiń kórsetilýine qanaǵattaný deńgeıi tómendegenin, MÁMS-ke qatysty berilgen naqty usynystar oryndalmaı otyrǵanyn aıtqan edi.
Óz baıandamasynda Densaýlyq saqtaý mınıstri Qazaqstanda ólim azaıǵanyn, ómir súrý uzaqtyǵy artyp, salany qarjylandyrý kólemi artqanyn aıtyp otyr.
Sondaı-aq, Aqmaral Álnazarova medıtsınalyq saqtandyrýǵa qatysty jańa zańnamada qandaı ózgerister bolatynyn aıtyp berdi.