2027 jyly qazaq-ózbek shekarasynda 100 gektarlyq arnaıy ındýstrııalyq aımaq ashylady

ASTANA. KAZINFORM – Májilis Qazaqstan men Ózbekstan Úkimetteriniń arasyndaǵy Ortalyq Azııa «halyqaralyq ónerkásiptik kooperatsııa ortalyǵynyń qyzmetin retteý týraly zańdy qabyldady.

 2027 жылы қазақ-өзбек шекарасында 100 гектарлық арнайы индустриялық аймақ ашылады
Фото: ӨР Стратегиялық және өңіраралық зерттеулер институты

Qujatty depýtattarǵa tanystyrǵan Saýda jáne ıntegratsııa mınıstri Arman Shaqqalıev atalǵan ortalyq «Atameken» (Qazaqstan) jáne «Gýlıstan» (Ózbekstan) baqylaý-ótkizý beketterine jaqyn ornalaspaq. Onyń quramyna óndiristik alańdar men qoımalar, kólik ınfraqurylymy kiredi.

- Bul júk tasymaldaýdy jyldamdatyp, logıstıkalyq shyǵyndardy azaıtýǵa, jetkizý tizbegindegi qatysýshylar sanyn qysqartýǵa tutyný arqyly ónimniń sońǵy qunyn tómendetýge múmkindik beredi. Sondaı-aq, «Soltústik – Ońtústik» dálizi aıasyndaǵy óndiristik kooperatsııany damytýǵa múmkindik beredi. Kelisim boıynsha ortalyqtyń jalpy aýmaǵy 100 gektar bolady. Qazaqstandaǵy bóligi — 50 gektar, Ózbekstandaǵy bóligi — 50 gektar, - dedi mınıstr.

Atalǵan aýmaqqa óńirlik ındýstrııalyq aımaq mártebesi beriledi dep kózdelgen. Arman Shaqqalıev ortalyqqa qajet ınfraqurylymdy qalyptastyrýǵa bıýdjet qarjysy jumsalmaıtynyn atap ótti.

- Túrkistan oblysy ákimdigi ashyq konkýrs ótkizip negizgi ınvestordy anyqtady. Investor ortalyqtyń ishki jáne syrtqy ınfraqurylymyna ınvestıtsııa salatyn bolady. Qazirgi tańda ınvestor ortalyqty qajetti ınfraqurylymmen qamtamasyz etý úshin jobalaý-smetalyq qujattama ázirleý jumystaryn júrgizýde. Tehnıkalyq jáne qurylys jumystary 2026 jyldyń 4-toqsanyna aıaqtalyp, resmı ashylýy 2027 jyldyń birinshi jartyjyldyǵyna josparlanyp otyr, - dedi vedomstvo basshysy.

Eki memleket osy ortalyqty iske qosý arqyly mashına jasaý, metal óńdeý, farmatsevtıka, elektrotehnıka, hımııa, teri óńdeý, toqyma jáne tigin ónerkásibin birlesip damytýǵa nıettenip otyr.

- Ortalyqta «Global Textile» kompanııasynyń daıyn toqyma ónimderin óndirý jobasy júzege asyrylady, - dedi mınıstr.

Qazirgi jospar boıynsha ortalyqta áýelde birneshe zaýyt pen fabrıka salynýy múmkin. Ol úshin 50 gektar jerge birinshe kezeńde 27 mlrd teńge ınvestıtsııa tartylmaq. Al ekinshi kezeńde ortalyqtyń jalpy aýmaǵyna 100 gektarǵa jetip, ınvestıtsııa kólemi 50 mlrd teńge bolady degen esep bar.

AQSh kompanııasy Ózbekstan Ulttyq ınvestıtsııalyq qorynyń aktıvterin basqaratynyn jazǵan bolatynbyz.

Сейчас читают