2027 jyly ǵaryshqa shyǵarylatyn túrki elderiniń birlesken spýtnıgi tanystyryldy

Bul kúnderi Tashkentte Space Technology Conference konferentsııasy ótip jatyr. Onyń aıasynda TMU-ǵa múshe elder ǵarysh agenttikteriniń jetekshileri bas qosty. Kezdesýde mamandar 12U CubeSat spýtnıgin qurastyrý jáne ony kosmosqa shyǵarý máselelerin talqylady.

Іs-sharada alǵash bolyp sóz alǵan Túrki memleketteri uıymynyń Bas hatshysy Kýbanychbek Omýralıev kezdesýdiń mańyzyna toqtala kele, qazaqstandyq delegatsııa ókilderine alǵys bildirdi.

— Kezdesýlerge turaqty qatysyp, birlesken kúsh-jigerlerdi ilgeriletýge úles qosyp kele jatqan barsha tarapqa rızashylyǵymdy bildiremin. Ásirese, bizdiń negizgi bastamamyz — 12U CubeSat spýtnıginiń modelin ákelgeni úshin qazaq baýyrlarymyzǵa alǵysymyz sheksiz, — dedi uıymnyń Bas hatshysy.

Kýbanychbek Omýralıev TMU-ǵa múshe elder birlesip kosmosqa ushyratyn jerserikti qurastyrý jumystary aıaqtalýǵa jaqyn ekenin atap ótti.

— Bul jetistik bizdiń tehnıkalyq múmkindigimizben qatar, ujym retindegi qarym-qabiletimizdi kórsetedi. Osy rette men qazaq tarapynan CubeSat spýtnıginiń jobasy úshin Halyqaralyq avıatsııa komıtetinen radıojıilikti úılestirý ruqsatyn alý isin jedeldetýdi suraımyn. Sizder kásibı maman retinde qurylǵyny tirkeý jáne ol boıynsha barlyq tehnıkalyq málimetterdi jetik bilesizder, — dep málim etti Kýbanychbek Omýralıev.

Konferentsııaǵa qazaqstandyq delegatsııany bastap kelgen Aeroǵarysh komıteti tóraǵasynyń orynbasary Qýandyq Shúlenbaev spýtnıkti qurastyrý kezeńderine toqtalyp, ár eldiń úlesin atap ótti.

— Bul jobany negizinen biz iske asyryp jatyrmyz. Sondaı-aq oǵan basqa da túrki memleketteri tartylǵan. Máselen, bir el qarjylyq qoldaý kórsetse, endi biri qurylǵynyń qozǵaltqyshyn qurastyryp jatyr. Atalǵan jerserikti 2027 jyly ǵarysh keńistigine shyǵarý josparlanǵan, — dedi Kazinform tilishisiniń saýalyna jaýap bergen Qýandyq Shúlenbaev

Onyń aıtýynsha, 12U CubeSat nanospýtnık sanalady. Ol ǵaryshta 5 jylǵa deıin zertteý júrgizýge qaýqarly.

— Jerserikti paıdalaný merzimi shamamen 3-5 jyl. Máselen, KazEOSat-1 jáne KazEOSat-2 iri spýtnıkteri keńistikte 7 jyl qyzmet etedi. Eger qurylǵy zaqymdalmasa, ondaǵy otyn kólemi jetkilikti bolsa, jerserikti qoldaný merzimin uzartýǵa bolady. Búkil álemdik tájirıbege saı, spýtnık 7-8 jyldyq eseppen ushyrylady, biraq keıbir qurylǵylar 15-20 jylǵa deıin jumys isteıdi, — dep túıindedi komıtet basshysynyń orynbasary.

Eske salaıyq, jaqynda kosmosqa attanatyn tuńǵysh ózbek ǵaryshkerine qoıylatyn talaptar jarııalandy.

Qosa ketsek, bıyl Ózbekstan men Qytaı ǵaryshqa Jerdi qashyqtyqtan zondtaıtyn spýtnık ushyrýdy josparlap otyr.

Sondaı-aq, Ózbekstan 2028 jyly «Mirzo Ulug’bek» spýtnıgin ǵarysh keńistigine shyǵarady.