2027 jyly elordada jeti álem chempıonaty ótedi
ASTANA. KAZINFORM — Kelesi jyly elorda tórinde jeti birdeı álem chempıonaty jalaýyn kóteredi. Bul týraly VI Dúnıejúzilik kóshpendiler oıyndary jeńimpazdaryn marapattaý rásiminde Memleket basshysy Qasym-Jomart Toqaev aıtty.
— Qazirgi tańdaǵy sport salasyndaǵy jetistikter — bul Úkimettiń, tıisti mınıstrliktiń tabandy jumysynyń alǵashqy nátıjesi degen sóz. Alaıda aldyńyzda turǵan mindet az emes. Elimizde túrli halyqaralyq dodalar ótkizilýde. Bıyl Astanada dástúrli sport pen tsıfrlyq tehnologııany ushtastyrǵan biregeı jarys — Bolashaq oıyndary sátti ótti. Kelesi jyly elorda tórinde jeti birdeı álem chempıonaty jalaýyn kóteredi. Óte aýqymdy jumysty atqarýymyz kerek, — dedi Memleket basshysy.
Prezıdenttiń paıymynsha, munyń bári elimizdiń abyroıyna, bedeline óte qajetti halyqaralyq is-sharalar sanalady.
— Al 2029 jyly Almatyda 10-qysqa Azııa oıyndary ótedi. Osy mańyzdy sharalardyń bárin sapaly ári joǵary deńgeıde uıymdastyrý qajet, — dedi Qasym-Jomart Toqaev.
Buǵan deıin Almatyda Denıs Tenniń qurmetine halyqaralyq týrnır ótetinin jazǵanbyz.
Aıta keteıik, Qazaqstan quramasy 31 tamyz ben 6 qyrkúıek aralyǵynda Qyrǵyzstanda ótken VI Dúnıejúzilik kóshpendiler oıyndarynda 74 medal jeńip aldy.
