2027 jyly Astanada ÝEFA kongresi ótedi

Bul — uıymnyń eń joǵary basqarýshy organy. Kongress barysynda Eýropa fýtbolynyń aldaǵy jyldardaǵy damý baǵytyn aıqyndaıtyn mańyzdy sheshimder qabyldanady.

Kongreske ÝEFA quramyna kiretin 55 ulttyq fýtbol qaýymdastyǵynyń ókilderi, uıym prezıdenti, Atqarýshy komıtet músheleri, FIFA, eýropalyq lıgalar, klýbtyq birlestikter jáne halyqaralyq sport uıymdarynyń ókilderi qatysady.

Aldaǵy kongrestiń basty erekshelikteriniń biri — saılaý rásiminiń ótýi. Dál osy Astanada ÝEFA prezıdenti men Atqarýshy komıtet músheleri saılanady.

Qazaqstannyń osyndaı aýqymdy is-sharany ótkizý quqyǵyna ıe bolýy — ÝEFA-nyń elimizge bildirgen joǵary seniminiń jáne halyqaralyq deńgeıdegi sporttyq is-sharalardy uıymdastyrýdaǵy tájirıbesi men áleýetiniń moıyndalǵanynyń aıqyn dáleli. Kongresti uıymdastyrýǵa baılanysty barlyq shyǵyndy ÝEFA óz qarajaty esebinen qarjylandyrady.

ÝEFA kongresin ótkizý Qazaqstanda fýtboldy damytýǵa baǵyttalǵan júıeli jumystyń zańdy jalǵasy bolmaq. Elimizde fýtbol ınfraqurylymy jańǵyrtylyp, balalar men jasóspirimder fýtbolyn damytýǵa erekshe kóńil bólinýde. Sonymen qatar kásibı klýbtardy basqarý tıimdiligin arttyrýǵa baǵyttalǵan reformalar kezeń-kezeńimen júzege asyrylyp jatyr.

Kásibı fýtboldy kommertsııalandyrýdyń alǵashqy kezeńinde 11 klýb ınvestıtsııa tartýǵa negizdelgen jańa basqarý modeline kóshti. Osy baǵytqa 80 mlrd teńgeden astam ınvestıtsııa tartyldy. Ekinshi kezeńde taǵy 8 kásibı klýbty kommertsııalandyrý josparlanyp otyr. Bul klýbtardyń qarjylyq derbestigin kúsheıtip, salanyń turaqty damýyna jańa serpin beredi.

Eske salsaq, 4 tamyzda Frantsııanyń «Parı Sen-Jermen» fýtbol klýby Qazaqstanda óziniń resmı akademııasyn ashatynyn jarııalady.

Álemdik fýtboldaǵy jetekshi brendterdiń biriniń elimizge kelýi balalar men jasóspirimder fýtbolyn damytýǵa, zamanaýı daıarlyq ádistemelerin engizýge jáne halyqaralyq tájirıbe almasýǵa múmkindik beredi.

Qazaqstan Eýropanyń fýtbol keńistigindegi óz ornyn kezeń-kezeńimen nyǵaıtyp keledi. Búginde elimiz halyqaralyq deńgeıdegi iri sporttyq is-sharalardy joǵary deńgeıde ótkize alatyn ári fýtboldy barlyq baǵytta turaqty damytýǵa qolaıly jaǵdaı qalyptastyrǵan memleket retinde tanylyp otyr.