2027 jyly áleýmettik salanyń shyǵystary 10,5 trln teńge bolady
ASTANA. KAZINFORM – 2027 jyly áleýmettik salanyń shyǵystary 10,5 trln teńge bolady. Bul týraly Úkimet otyrysynda aldaǵy 3 jyldyq respýblıkalyq bıýdjet týraly zań jobasyn tanystyrǵan Qarjy mınıstri Mádı Tákıev aıtty.
- 2027-2029 jyldarǵa arnalǵan respýblıkalyq bıýdjet týraly zań jobasy elimizdiń áleýmettik-ekonomıkalyq damý boljamy negizinde ázirlendi. 2027 jylǵa arnalǵan negizgi parametrleri kelesideı: 25,6 trln teńgeni nemese jalpy ishki ónimniń 12,9 paıyzyn qurady. Ulttyq qordyń kepildendirilgen transfert kólemi 2,4 trln teńge mólsherinde belgilendi. 2 trln teńge kólemindegi nysanaly transfert asa mańyzdy obektilerge jáne jalpy ulttyq mańyzy bar jobalarǵa baǵyttalatyn bolady. Bıýdjet 2027 jyly jalpy ishki ónimniń 2,3 paıyzy bolady dep josparlanǵan. Osy jyldyń josparymen salystyrǵanda 2,5 trln teńgege artyp, 30,2 trln teńge bolady, - dedi mınıstr.
Onyń málimetinshe, áleýmettik salanyń shyǵystary 2027 jylǵa 10 trln 544 mlrd teńge kóleminde josparlanǵan. Bıýdjet jobasynda áleýmettik tólemderdi alýshylar sanynyń ózgerýi men ındeksteý eskerildi. Halyqty áleýmettik qoldaýdyń qajetti deńgeıin qamtamasyz etýge qosymsha 739 mlrd teńge kózdeldi.
- Ekonomıkanyń naqty sektoryn qoldaýǵa arnalǵan bıýdjet shyǵysy 3 trln 892 mlrd teńge boldy. Bul osy jyldyń deńgeıinen 507 mlrd teńgege artyq. Shyǵystyń ulǵaıýy eń aldymen el ekonomıkasy úshin júıeli, mańyzy bar ınfraqurylymdyq jobalardy iske asyrýdy jalǵastyrýmen baılanysty boldy. Jalpy alǵanda, jergilikti atqarýshy organdardyń damý bıýdjetterin eskere otyryp, ekonomıkanyń naqty sektoryn qoldaýǵa arnalǵan shyǵystar shamamen 7 trln teńge bolady. Kúshtik blogqa 3,3 trln teńge kózdelgen. Ol osy jyldyń josparyna qaraǵanda 257 mlrd teńgege ulǵaıyp otyr. Ákimshilik memlekettik organdarǵa 787 mlrd teńge kózdeldi, - dedi Mádı Tákıev.
Mınıstrdiń aıtýynsha, bul shyǵystardy qalyptastyrý kezinde memlekettik shyǵystardyń tıimdiligi men nátıjeliligi, ákimshilik shyǵyndardyń negizsiz ulǵaıýyna jol bermeý, jáne respýblıkalyq bıýdjettiń teńgerimdiligin saqtaý qaǵıdattary eskerildi.
- Bul rette ákimshilik shyǵystardy qysqartý, memlekettik organdardyń ózderine júktelgen fýnktsııalary men qabyldanǵan memlekettik mindettemelerin oryndaýy úshin táýekelder týdyrmaıdy. Sonymen qatar bıýdjet jobasy júrgizilip jatqan konstıtýtsııalyq jáne ınstıtýtsıonaldyq reformalarǵa baılanysty júıeli ózgerister nazarǵa alyndy. Tıisinshe, Quryltaı men Qazaqstan Halyq Keńesiniń qyzmetin qamtamasyz etýge arnalǵan shyǵystar eskerildi, - dedi ol.
