2027 jyly 500 mektepte jasandy ıntellekt qoldanyla bastaıdy - Prezıdent
ASTANA. KAZINFORM – Prezıdent Sinovation Ventures jáne 01.ai kompanııalarynyń bas dırektory Lı Kaı-Fýdy qabyldady, dep habarlaıdy Aqorda.
Qasym-Jomart Toqaev Lı Kaı-Fý sarapshy retinde Qazaqstannyń jasandy ıntellekt pen tsıfrlyq transformatsııany damytý baǵytyndaǵy ustanymdaryn qalyptastyrýǵa zor úles qosqanyn atap ótti.
Memleket basshysy Úkimet Lı Kaı-Fýdyń usynymdaryna jáne ozyq halyqaralyq tájirıbege súıene otyryp, orta bilim berý júıesine jasandy ıntellektini engizý jobasyn iske asyrýǵa kiriskenin aıtty.
Lı Kaı-Fý shaǵyn jınaqty mektepterge jasandy ıntellektini engizý jobalarynyń negizgi parametrleri jóninde málimdedi.
Pılottyq joba birinshi kezeńde bıyl qyrkúıekten bastap, 10 mektepte júzege asyrylady. 2027 jyldyń qańtarynan bastap ony 60 mektepke, al sáýirde 500 mektepke engizý josparlanyp otyr.
Prezıdent jobany iske asyrýda onyń aýqymyn keńeıtý jáne bilim sapasyn arttyratyn naqty nátıjege qol jetkizý mańyzdy ekenine toqtaldy.
Jasandy ıntellektiniń ıgiligin qalanyń da, aýyldyń da turǵyndary teńdeı kórýi qajet ekenine basa mán berildi.
Bul rette Memleket basshysy jasandy ıntellektini kásipkerlikti damytýdyń bir tetigi retinde paıdalaný perspektıvasyna nazar aýdardy.
Kezdesýde Memleket basshysyna jasandy ıntellekt jáne tsıfrlyq transformatsııa salasyndaǵy birqatar bastama tanystyryldy.
t.me/aqorda_resmi
