2027 jylǵy ústel tennısinen álem chempıonaty Qazaqstanda ótedi
ASTANA. KAZINFORM — Qazaqstan 2027 jylǵy ústel tennısinen álem chempıonatyn ótkizý estafetasyn resmı túrde qabyldady. Bul týraly Qazaqstan Respýblıkasy Ústel tennısi federatsııasyna silteme jasap, Astana qalasynyń ákimdigi málim etti.
Ákimdiktiń málimetinshe, halyqaralyq ústel tennısi federatsııasynyń (ITTF) týyn saltanatty tabystaý rásimi Londonda ótip jatqan qazirgi álem chempıonaty alańynda uıymdastyryldy.
Osy sátten bastap Qazaqstan álemdegi eń iri halyqaralyq sporttyq jarystardyń birin uıymdastyrýshy mártebesin resmı túrde ıelendi. Ústel tennısinen álem chempıonaty 2027 jylǵy 22-30 mamyr aralyǵynda Astanada ótedi.
Qazaqstan Ortalyq Azııa elderi ishinde alǵash ret ústel tennısinen álem chempıonatyn ótkizetin memleket atanyp otyr. Bul — búkil óńir úshin tarıhı jetistik. Osyndaı deńgeıdegi týrnırdi ótkizý otandyq sportty damytýǵa jáne eldiń halyqaralyq bedelin nyǵaıtýǵa mańyzdy serpin beredi.
Chempıonatqa sportshylar, jattyqtyrýshylar, ulttyq federatsııalar ókilderi, tóreshiler men halyqaralyq delegattardy qosa alǵanda shamamen 1250 resmı adam keledi dep kútilip otyr.
Sondaı-aq jarys sheteldik jankúıerler men elorda qonaqtarynyń kóptep kelýine yqpal etedi.
Jarys bes sanat boıynsha ótedi: erler men áıelder arasyndaǵy jekeleı syn, erler men áıelder juby, sondaı-aq aralas juptar básekesi.
Negizgi jarys alańy retinde 8 myńǵa jýyq kórermen sııatyn «Barys Arena» muz saraıy tańdaldy. Qosymsha alań retinde 6,8 myń adamǵa arnalǵan QAZAQSTAN jeńil atletıka kesheni paıdalanylady.
Chempıonat aıasynda Astanada ITTF Summit 2027 is-sharasy da uıymdastyrylady. Onyń quramyna Halyqaralyq ústel tennısi federatsııasynyń jyl saıynǵy Bas assambleıasy (AGM) men Atqarý komıtetiniń otyrystary kiredi.
«Astanada álem chempıonatynyń ótýi — Qazaqstanda ústel tennısiniń damyp, jańa deńgeıge kóterilgeniniń aıqyn kórinisi.
Bul biz úshin álemdik deńgeıdegi týrnır ótkizip qana qoımaı, elimizdiń halyqaralyq sport arenasyndaǵy ornyn nyǵaıtýǵa múmkindik beredi», — dep atap ótti uıymdastyrý komıteti.
2027 jylǵy álem chempıonatyn Qazaqstanda ótkizý týraly sheshim 2025 jylǵy 27 mamyrda Qatardyń Doha qalasynda ótken ITTF bas assambleıasynda qabyldanǵan bolatyn. Týrnırdi ótkizý quqyǵyna Qazaqstannan bólek Frantsııa, AQSh, Qytaı jáne Brazılııa úmitker boldy.
Fınalda Qazaqstan 54,68 paıyz daýys jınap, jeńiske jetti.
— Týdy Qazaqstanǵa tabystaý — elge aldaǵy álem chempıonatynyń ıesi retinde kórsetilgen senimniń belgisi. Biz Astananyń uıymdastyrý jumysyn joǵary deńgeıde ótkizip, álemdik ústel tennısine laıyqty alań bolatynyna senimdimiz, — dep málimdedi Halyqaralyq ústel tennısiniń federatsııasy (ITTF).
Buǵan deıin ústel tennısinen qytaılyq álem chempıony Qazaqstan atynan óner kórsetetinin jazdyq.
