2027 jylǵy egis naýqanyna qarjy berý 1 qazanda bastalady
ASTANA. KAZINFORM — «Agrarlyq nesıe korporatsııasy» 1 qazannan bastap aýyl sharýashylyǵy taýaryn óndirýshilerden 2027 jylǵy kóktemgi egis jáne egin jınaý jumystaryna arnalǵan ótinishterdi qabyldaı bastaıdy.
Qarjylandyrý «Keń dala 2» baǵdarlamasy aıasynda beriledi. Aýyl sharýashylyǵy taýaryn óndirýshiler úshin syıaqy mólsherlemesi jyldyq 5% deńgeıinde belgilengen.
Erte qarjylandyrý tetigi agrarshylarǵa kelesi maýsymǵa aldyn ala daıyndalýǵa múmkindik beredi, ıaǵnı olar qajetti resýrstardy satyp alyp, aýyl sharýashylyǵy tehnıkasyn jóndep, aldaǵy óndiristik shyǵyndaryn josparlaı alady.
Aýyl sharýashylyǵy mınıstrliginiń málimetinshe, «Agrarlyq nesıe korporatsııasy» bul tetikti alǵash ret 2024 jyldyń sońynda engizgen. Sodan beri aýyl sharýashylyǵy óndirýshileri egis naýqany bastalǵanǵa deıin qarjyǵa qol jetkizip keledi.
Qarjylandyrý kólemi de artyp otyr. 2025 jyldyń qorytyndysy boıynsha «Keń dala 2» baǵdarlamasy aıasynda aýyl sharýashylyǵy taýaryn óndirýshilerge 501,5 mlrd teńge berilgen. Al 2026 jylǵy maýsym boıynsha 16 qyrkúıektegi jaǵdaıǵa sáıkes qarjylandyrý kólemi 664,4 mlrd teńgege jetti.
Baǵdarlama boıynsha qarjyny ekinshi deńgeıdegi bankter, kredıttik seriktestikter, áleýmettik-kásipkerlik korporatsııalar jáne «Agrarlyq nesıe korporatsııasynyń» fılıaldary arqyly alýǵa bolady.
Ótinish qabyldaý 2026 jylǵy 1 qazanda bastalady.
Eske salaıyq, buǵan deıin Qazaqstanda aýyl sharýashylyǵy tehnıkasyn óndirý 22,3%-ǵa artqanyn jazǵanbyz.
