2027 jylǵy bıýdjette dollar baǵamy birden 60 teńgege tómendedi
ASTANA. KAZINFORM – Qazaqstan Úkimeti 2027 jylǵa arnalǵan respýblıkalyq bıýdjettegi dollar baǵamyn ótken jylmen salystyrǵanda tómen deńgeıde belgiledi. Ulttyq ekonomıka mınıstrligi boljamnyń ne sebepti qaıta qaralǵanyn túsindirdi.
QR UEM birinshi vıtse-mınıstri Azamat Ámrın 2026 jylǵa arnalǵan bıýdjette dollar baǵamy 540 teńge deńgeıinde alynǵanyn eske saldy.
– 2026 jylǵa bıýdjetti josparlaý jumysy 2025 jyldyń shilde-tamyz aılarynda júrgizildi. Sol kezde dollar baǵamy 540 teńge shamasynda boldy, tipti 550-554 teńgege deıin jetken kezi bar. Sondyqtan sol kezdegi baǵamnyń ózgerý qarqynyna súıenip, jalpy osy deńgeıdegi baǵam saqtalady dep kúttik, – dep túsindirdi ol.
Spıkerdiń aıtýynsha, bıylǵy jaǵdaı ózgergen.
– Bıylǵy baǵamnyń ózgerý dınamıkasyn eskerip, 480 teńge dep boljap otyrmyz. Al jyl basynan bergi ortasha baǵam 478 teńge bolyp otyr. Sol sebepti barynsha tómengi deńgeıde – 480 teńge baǵamyn belgiledik, – dedi vıtse-mınıstr.
Aıta keteıik, 2027-2029 jyldarǵa arnalǵan respýblıkalyq bıýdjet jobasynda munaıdyń baǵasy barreline 70 dollar deńgeıinde alynǵan. Bul qazirgi bıýdjette kózdelgen kórsetkishten 10 dollarǵa joǵary.
Buǵan deıin Qarjy vıtse-mınıstri Abzal Beısenbekuly memlekettik organdar suraǵan qarjynyń 5 trln teńgesi negizsiz bop shyqqanyn aıtqan edi.
Sondaı-aq Ulttyq qordan strategııalyq jobalarǵa 5 trln teńge bólinedi.
