2027 jylǵy 1 shildeden kóship kelýshilerge Qazaqstanǵa kirý úshin elektrondyq ruqsat alý mindetti bolady
ASTANA. KAZINFORM — Úkimet qaýlysymen kóship kelýshilerdiń Qazaqstanǵa kelýi jáne bolýy, elden ketýi men kóshi-qon baqylaýyn júzege asyrý qaǵıdalaryna ózgertýler engizildi.
Qujatqa sáıkes, 2026 jylǵy 1 qarashadan bastap — Qazaqstan Respýblıkasynyń Memlekettik shekarasyndaǵy mynadaı ótkizý pýnktterinde: Aqtaý halyqaralyq áýejaıynda, «Úrlitóbe» avtomobıl ótkizý pýnktinde (Pavlodar oblysy), «Aýqatty» avtomobıl ótkizý pýnktinde (Jambyl oblysy), «Atameken» avtomobıl ótkizý pýnktinde (Túrkistan oblysy) jáne «Nurly Jol» avtomobıl ótkizý pýnktinde (Jetisý oblysy), kóship kelýshini kirgizýden bas tartylmaıdy, ruqsat resimdeý qajettigi túsindiriledi;
2027 jylǵy 1 qańtardan bastap — Qazaqstan Respýblıkasynyń Memlekettik shekarasynda: Astana jáne Almaty qalalarynyń halyqaralyq áýejaılarynda, kóship kelýshini kirgizýden bas tartylmaıdy, ruqsat resimdeý qajettigi túsindiriledi;
2027 jylǵy 1 naýryzdan bastap — Qazaqstan Respýblıkasynyń Memlekettik shekarasyndaǵy qalǵan barlyq ótkizý pýnktteri arqyly kirý kezinde elektrondyq ruqsattyń bolýyn talap etý, bul rette kóship kelýshini kirgizýden bas tartylmaıdy, oǵan elektrondyq ruqsatty resimdeý qajettigi túsindiriledi;
2027 jylǵy 1 shildeden bastap — kirýge elektrondyq ruqsattyń mindettiligin endirý, onyń bolmaýy kóship kelýshini Qazaqstan Respýblıkasyna kirgizýden bas tartýǵa negiz bolady.
Rastaıtyn qujattary bolǵan jaǵdaıda, Qazaqstan Respýblıkasyna kelýge elektrondyq ruqsat alýdan myna adamdar bosatylady:
- Shet memleketterdiń, úkimetterdiń jáne halyqaralyq uıymdardyń basshylary men olardyń otbasy músheleri;
- Shet memleketter parlamentteriniń, úkimetteriniń jáne halyqaralyq uıymdardyń músheleri men olardyń otbasy músheleri;
- Qazaqstan Respýblıkasynyń qurmetti konsýldary men olardyń otbasy músheleri;
- Qazaqstan Respýblıkasyndaǵy dıplomatııalyq jáne olarǵa teńestirilgen ókildikterde, halyqaralyq uıymdarda jumys isteýge jiberilgen, tıisti mártebesi bar dıplomatııalyq, qyzmettik jáne halyqaralyq uıymdar pasporttarynyń ıeleri, sondaı-aq Qazaqstanda akkredıttelgen shet memleketterdiń konsýldyq mekemeleriniń qyzmetkerleri;
- Qazaqstan Respýblıkasynyń Syrtqy ister mınıstrligi bergen akkredıtteý kýálikteriniń ıeleri;
- Kýrerlik paraǵy bolǵan jaǵdaıda dıplomatııalyq poshtany alyp júretin dıplomatııalyq kýrerler;
- Qazaqstan Respýblıkasy Prezıdenti Ákimshiliginiń, Qazaqstan Respýblıkasy Quryltaıynyń, Joǵarǵy Sotynyń, Úkimeti Apparatynyń, arnaýly memlekettik organdardyń, Qorǵanys mınıstrliginiń jáne syrtqy saıası qyzmet salasyndaǵy ýákiletti memlekettik organnyń shaqyrýymen keletin shetel azamattary;
- On alty jasqa tolmaǵan adamdar;
- Alpys bes jasqa tolǵan jáne odan asqan adamdar;
- Qazaqstan Respýblıkasynyń Memlekettik shekarasyn kesip ótpeı, halyqaralyq áýejaılardyń tranzıttik aımaǵynda bolatyn tranzıttik jolaýshylar;
- Qazaqstan Respýblıkasynyń qoldanystaǵy vızasy bar shetel azamattary;
- Qazaqstan Respýblıkasynda ýaqytsha turýǵa ruqsaty nemese turýǵa yqtııarhaty bar shetel azamattary;
- Qazaqstan Respýblıkasynyń zańnamasyna sáıkes bosqyn dep tanylǵan adamdar;
- Baspana izdeýshi adamdar;
- Bas deklaratsııada (ushý tapsyrmasynda) tıisti jazbasy bar áýe kemeleri ekıpajdarynyń músheleri;
- Keme rólinde nemese odan alynǵan úzindi kóshirmede tıisti jazbasy bar teńiz jáne ózen kemeleri ekıpajdarynyń músheleri;
- Árbir reıske bekitiletin quram tizimderine engizilgen poıyz, refrıjerator jáne lokomotıv brıgadalarynyń músheleri;
- Tıisti qyzmettik jáne issapar kýálikteri (nusqamalary) bar úkimetaralyq feldegerlik baılanys qyzmetiniń qyzmetkerleri;
- Qazaqstan Respýblıkasy ratıfıkatsııalaǵan halyqaralyq sharttarda ózgeshe kózdelmese, tıisti qyzmettik jáne issapar kýálikteri (nusqamalary) bar kúdiktilerdi, aıyptalýshylardy jáne sottalǵandardy aıdaýylmen alyp júretin quqyq qorǵaý organdarynyń qyzmetkerleri;
- Memleketterdiń resmı memlekettik jáne úkimettik delegatsııalarynyń músheleri men olardy ertip júretin adamdar;
- Tıisti qyzmettik kýálikteri jáne uıym basshylyǵy men jergilikti atqarýshy organ kýálandyrǵan ataýly tizimderi bar, Qazaqstan aýmaǵyndaǵy transshekaralyq qurylystarǵa qyzmet kórsetetin qyzmetkerler;
- Qazaqstan Respýblıkasynyń halyqaralyq áýejaılaryna májbúrli (tótenshe) qonǵan áýe kemeleriniń jolaýshylary;
- Qazaqstan Respýblıkasynyń halyqaralyq teńiz porttaryna májbúrli (tótenshe) kirgen teńiz kemeleriniń jolaýshylary;
- Qazaqstan Respýblıkasy ratıfıkatsııalaǵan halyqaralyq sharttarda kózdelgen jaǵdaılarda izdestirý-qutqarý operatsııalaryna baılanysty Memlekettik shekarany kesip ótetin adamdar;
- Qazaqstannyń memlekettik organdarynyń shaqyrýymen gýmanıtarlyq mıssııalarǵa qatysýǵa nemese tótenshe jaǵdaılardyń saldaryn joıýǵa kelgen adamdar;
- Shuǵyl medıtsınalyq kómek kórsetý úshin Qazaqstanǵa keletin medıtsınalyq kómek brıgadalarynyń quramyndaǵy medıtsına uıymdarynyń qyzmetkerleri;
- Halyqaralyq júk tasymalyn júzege asyratyn, tirkemeni qosa alǵanda, ruqsat etilgen jalpy salmaǵy 6 tonnadan asatyn nemese paıdaly júktemesi 3,5 tonnadan asatyn júk kólik quraldarynyń júrgizýshileri;
- Jolaýshylardy halyqaralyq tasymaldaıtyn jáne Qazaqstan aýmaǵy arqyly tranzıtpen júretin, júrgizýshiniń ornyn qospaǵanda, 12-den astam otyratyn orny bar avtobýstardyń júrgizýshileri;
- Jerleý úshin qaıtys bolǵan adamdardyń máıitterin alyp júretin, onyń ishinde tranzıtpen ótetin adamdar.
