2027 jylǵa qaraı Qazaqstannyń iri qalalarynda 5G jelisiniń qamtylýy 75%-ǵa jetpek
ASTANA. KAZINFORM – Qazaqstanda mobıldi jáne spýtnıktik baılanys júıesin damytý jumystary jalǵasyp jatyr. Bul týraly QR Jasandy ıntellekt jáne tsıfrlyq damý mınıstrligi habarlady.
2027 jyldyń sońyna deıin 4G jelisiniń eldegi barlyq eldi mekendi qamtý úlesi 92%-ǵa jetedi, al 5G bazalyq stantsııalarynyń sany 3,5 myńnan asady.
Vedomstvo málimetinshe, qazirgi ýaqytta 3G baılanysy 2 704 aýylda qoljetimdi, al 4G jelisi 2 608 eldi mekende jumys istep tur.
Sonymen qatar respýblıkalyq mańyzy bar qalalar men oblys ortalyqtarynda qazirdiń ózinde 2 509 5G bazalyq stantsııasy iske qosylǵan.
– 2027 jyldyń sońyna qaraı 4G jelisi barlyq eldi mekenniń 92%-yna qamtıtyn bolady, al 5G jelisi 3 500-den astam bazalyq stantsııa arqyly keńeıtiledi, — dep habarlady mınıstrlik.
Vedomstvo iri megapolısterge erekshe kóńil bólinip otyrǵanyn atap ótti.
– Bul ásirese, eldiń iri qalalary — Astana, Almaty jáne Shymkent úshin mańyzdy, munda 5G jelisiniń qamtylý deńgeıi 75%-ǵa jetýi tıis, — delingen habarlamada.
Sondaı-aq Qazaqstanda shalǵaı óńirler úshin spýtnıktik ınternetti damytý jalǵasyp jatyr.
– Qazirgi ýaqytta el naryǵynda resmı túrde eki GEOJ -operator qyzmet kórsetedi, 2027 jyldyń sońyna deıin taǵy eki kompanııanyń iske qosylýy josparlanyp otyr, - dedi mınıstrlik.
Mekemeniń habarlaýynsha, spýtnıktik baılanysty damytý alys jáne qoljetimsiz eldi mekender úshin áli de ózekti bolyp otyr.
Buǵan deıin Qazaqstanda mobıldi baılanys tarıfteriniń ózgerý sebepteri atalǵan bolatyn.
