2027 jylǵa deıin kolledj stýdentteriniń jataqhana máselesi tolyq sheshiledi - mınıstr
ASTANA. KAZINFORM – Qazir elimizde 772 kolledjde 565 myń stýdent bilim alyp jatyr. Bul týraly Májiliste kadrlyq áleýetti nyǵaıtý taqyrybynda ótip jatqan Úkimet saǵatynda Oqý-aǵartý mınıstri Ǵanı Beısembaev málim etti.
«Qazaqstan Respýblıkasy eńbek naryǵyn damytýdyń 2024 – 2029 jyldarǵa arnalǵan tujyrymdamasy sheńberinde Mınıstrlik eńbek naryǵyna sáıkes kadrlar daıarlaýǵa baǵyttalǵan is-sharalardy aıqyndady. Qazir elimizde 772 kolledjde 565 myń stýdent bilim alyp jatyr (396 myń – tegin, 169 myń – aqyly). Kadr daıarlaýdaǵy negizgi nátıjelerdiń biri – túlekterdi jumyspen qamtý. Búginde bul kórsetkish 79%-dy qurady. Oǵan qosa, oqý ornyn bitirgenderdiń 18%-y joǵary oqý oryndaryna túsken jáne ásker qataryna shaqyrylǵandar», - dedi Ǵ. Beısembaev.
Onyń aıtýynsha, Memleket basshysynyń tapsyrmasyn oryndaý úshin jastardy suranysqa ıe mamandyqtarmen 2025 jylǵa deıin 100% tegin qamtý kózdelgen. Bıyldyń josparly kórsetkishi oryndaldy. Kadrlardy ozyq daıarlaý modeli arqyly eńbek naryǵynyń bolashaq suranysyna jáne tehnologııalyq ózgeristerge sáıkes keletin mamandardy daıyndaýǵa 2025 jyly memlekettik tapsyrys kólemin 155 myńǵa deıin, onyń ishinde tehnıkalyq mamandyqtarǵa memlekettik tapsyrys kólemin 70 paıyzǵa deıin kóbeıtý kózdelip otyr.
«2024 jyldyń qyrkúıeginen bastap stıpendııa taǵy 50 paıyzǵa ósti. Búginde jataqhanaǵa muqtaj stýdentterdiń 87%-y jataqhanamen qamtamasyz etilgen. 2027 jylǵa deıin tapshylyqty túbegeıli sheshý úshin 10 myń orynǵa arnalǵan jataqhanalardy paıdalanýǵa berý qarastyrylǵan. Kolledjderge «janama kirý» mehanızmi arqyly óndiristen tájirıbeli mamandar tartylyp jatyr, olarǵa laýazymdyq jalaqysynyń 35% paıyzǵa deıingi mólsherde qosymsha aqy tóleý eskerilgen», - dedi mınıstr.
Budan buryn habardlanǵandaı, QR Parlamenti Májilisi tóraǵasynyń orynbasary Danııa Espaevanyń aıtýynsha, tehnıkalyq jáne kásiptik bilim berýdi reformalaý arqyly jumysshy kásipterdiń bedelin arttyrý qajet. Sebebi qazirgi kezde kásiptik-tehnıkalyq bilimi bar mamandyqtarǵa degen suranys joǵary bilimdi túlekterge degen qajettilikten 70 paıyzǵa artyq.
Eske salsaq, bıyl kúzde kolledj stýdentteriniń stıpendııasy taǵy 50 paıyzǵa ósti.
