2027 jylǵa deıin Astanada 177 myń jańa oqý orny paıda bolady
Oqý-aǵartý mınıstri Ǵanı Beısembaev pen Astana qalasynyń ákimi Jeńis Qasymbek elordada bilim berý ınfraqurylymyn damytý máselelerin talqylady. Ásirese, sapaly bilim berý qyzmetiniń qoljetimdiligi, qaýipsizdikti qamtamasyz etý, úsh aýysymda oqytatyn mektepterdi joıý, qalada jańa bilim oshaqtaryn salý, jaqyn qashyqtyqta balabaqshalar jelisin keńeıtý jáne pedagog kadrlaryn daıarlaý máseleleri qaraldy, dep habarlaıdy QazAqparat.
Úsh aýysymdy mektepter máselesin sheshý úshin bıyldyń ózinde elordada 11 mekteptiń, sonyń ishinde Oqý-aǵartý mınıstrliginiń qoldaýymen 13 600 oryndyq 10 mekteptiń qurylysy bastaldy. 2023-2026 jyldar aralyǵynda eki aýysymda oqytatyn barlyǵy 177 myń orynǵa arnalǵan 65 mektepti paıdalanýǵa berý josparlanýda.
«Óskeleń urpaqtyń qaýipsiz jáne jaıly ortada jan-jaqty damýyn qamtamasyz etý – bizdiń mindetimiz. Mınıstrlik óz tarapynan negizgi máselelerdi sheshý barysynda Astana ákimdigine qoldaý kórsetýge daıyn. Bilim berý ınfraqurylymyn damytýmen qatar joǵary bilikti kadrlardy qalyptastyrýǵa erekshe kóńil bólip kelemiz», – dedi Ǵanı Beısembaev.
Eske salaıyq, buǵan deıin oqý-aǵartý mınıstri elordadaǵy birqatar mektepterdi, sonyń ishinde úsh aýysymda oqytatyn bilim oshaqtaryn jeke ózi teksergen bolatyn. Ata-analar qaýymymen kezdesýler ótkizip, bilim berý uıymdarynda qaýipsizdikti qamtamasyz etý, tegin tamaqtandyrý men balalar úshin jaıly jaǵdaı uıymdastyrý máselelerin talqylady. Elordada barlyǵy 171 mektep bar, onda 260 myńnan astam bala oqıdy.
