2027 jylǵa deıin 2 399 veterınarııalyq nysan salynyp, jańartylady - AShM
ASTANA. KAZINFORM - Aýyl sharýashylyǵy mınıstri Aıdarbek Saparovtyń tóraǵalyǵymen ótken jınalysta Veterınarııalyq baqylaý jáne qadaǵalaý komıtetiniń osy jyldyń birinshi jartyjyldyǵyna arnalǵan jumys qorytyndylary qaraldy, dep habarlaıdy QR Aýyl sharýashylyǵy mınıstrliginiń baspasóz qyzmeti.
-Qazirgi veterınarııalyq qyzmet týyndaǵan qaýip-qaterlerge jedel den qoıyp qana qoımaı, olardy aldyn ala boljaýǵa, juqpaly aýrýlardyń taralýyna jol bermeı, otandyq mal sharýashylyǵynyń qaýipsizdigin qamtamasyz etýge tıis. Osyǵan baılanysty Memleket basshysynyń tapsyrmasyna sáıkes 2026–2030 jyldarǵa arnalǵan veterınarııa salasyn damytýdyń keshendi jospary ázirlendi. Qujatta jergilikti jerlerdegi veterınarııalyq ınfraqurylymdy nyǵaıtýdan bastap, «fermadan ústelge deıin» qaǵıdaty negizinde ónimniń tolyq qadaǵalanýyn qamtamasyz etýge deıingi veterınarııalyq júıeni keshendi jańǵyrtý kózdelgen, – dedi Aıdarbek Saparov.
Veterınarııalyq baqylaý jáne qadaǵalaý komıtetiniń tóraǵasy Qazbek Táshimovtiń aıtýynsha, Keshendi jospardy iske asyrýǵa 144,9 mlrd teńge qarastyrylǵan. 2026–2027 jyldary veterınarııalyq qyzmettiń ınfraqurlymyn nyǵaıtýǵa 66,2 mlrd teńge bólinedi. Osy qarajat esebinen 2 399 veterınarııalyq nysan salynady jáne satyp alynady.
Bul óńirlerde atalǵan qyzmetterdiń qoljetimdiligin arttyryp, profılaktıkalyq is-sharalardy sapaly ári tıimdi júrgizýge múmkindik beredi.
Salany tsıfrlandyrý aıasynda aqparattyq júıelerdi jetildirý, eksportqa shyǵarylatyn janýarlardy karantınge qoıý úderisterin avtomattandyrý jáne mal sharýashylyǵy ónimderin qadaǵalaý júıesin damytý baǵytynda tııanaqty jumystar júrgizilip jatyr.
Tsıfrlyq sheshimder veterınarııalyq baqylaýdyń barlyq kezeńderinde engizilgen. Mal soıý kásiporyndarynda ushalardy shtrıh-kod arqyly tańbalaý júıesi qoldanysqa engizilse, qoǵamdyq tamaqtaný oryndary «Veterınarııalyq-sanıtarııalyq saraptama» modýline qosylyp jatyr. Sonymen qatar Ulttyq veterınarııalyq referenttik ortalyq bazasynda jasandy ıntellekt tehnologııalaryn paıdalana otyryp, epızootııalyq ahýaldy boljaýǵa arnalǵan zamanaýı quraldar ázirlený ústinde.
Epızootııalyq salaýattylyqty qamtamasyz etý baǵytynda atqarylyp jatqan júıeli jumystardyń nátıjesinde Qazaqstan aýsyl, jylqynyń afrıkalyq obasy, shoshqanyń klassıkalyq jáne afrıkalyq obasy, sondaı-aq qus tumaýy sııaqty asa qaýipti janýarlar aýrýlary boıynsha Dúnıejúzilik janýarlar densaýlyǵy uıymy moıyndaǵan halyqaralyq mártebeleri men ózin-ózi deklaratsııalaý mártebelerin rastady.
Jınalysty qorytyndylaı kele Aıdarbek Saparov epızootııalyq ahýalǵa turaqty monıtorıng júrgizý, memlekettik veterınarııalyq baqylaýdy kúsheıtý, Keshendi jospar is-sharalaryn iske asyrý qarqynyn jedeldetý jumystaryn tıimdi atqarýdy, sondaı-aq Biryńǵaı avtomattandyrylǵan basqarý jáne Aýyl sharýashylyǵy janýarlaryn sáıkestendirý júıeleriniń turaqty jumysyn qamtamasyz etip, olardy keıinnen Eýrazııalyq ekonomıkalyq odaqqa múshe memleketter men sheteldik seriktesterdiń tsıfrlyq platformalarymen yqpaldastyrýdy tapsyrdy.
-Mal sharýashylyǵynyń turaqty damýy, otandyq ónimniń qaýipsizdigi, halyqaralyq seriktesterdiń senimi men eksporttyq naryqtardyń keńeıýi veterınarııalyq qyzmet jumysynyń nátıjeliligine tikeleı baılanysty. Sondyqtan kózdelgen barlyq shara sapaly, júıeli ári ýaqtyly oryndalýy qajet, – dedi mınıstr.
Osyǵan deıin Úkimet Veterınarııany damytýdyń keshendi josparyn bekitkeni týraly jazdyq.
