2027 jylǵa arnalǵan dári-dármek satyp alý naýqany úsh aı erte bastaldy
ASTANA. KAZINFORM — Qazaqstan Respýblıkasy Densaýlyq saqtaý mınıstrligi Biryńǵaı dıstrıbıýtormen birlesip 2027 jylǵa arnalǵan dárilik zattar men medıtsınalyq buıymdardy satyp alý naýqanyn bastady. Bul týraly vedomstvonyń baspasóz qyzmeti málim etti.
Bıyl alǵash ret satyp alý naýqany 2026 jylǵy 1 shildede, ıaǵnı belgilengen merzimnen úsh aı buryn bastaldy. Al statsıonarlyq medıtsınalyq kómek kórsetýge arnalǵan satyp alý rásimderi 22 maýsymnan bastap júrgizilmek.
Mınıstrliktiń málimetinshe, satyp alý naýqanynyń merziminen buryn bastalýy jetkizýshilermen kelisimsharttardy aldyn ala jasasýǵa, qajetti qorlardy qalyptastyrýǵa jáne medıtsınalyq uıymdardy 2027 jyldyń alǵashqy kúnderinen bastap dárilik zattarmen jáne medıtsınalyq buıymdarmen úzdiksiz qamtamasyz etýge múmkindik beredi.
Naýqandy iske qosýǵa daıyndyq barysynda Densaýlyq saqtaý mınıstrligi normatıvtik quqyqtyq bazany ózektendirý, baǵa belgileý máselelerin retteý jáne óńirlerdiń qajettiligin qalyptastyrý boıynsha aýqymdy jumys júrgizdi.
Óńirlik densaýlyq saqtaý basqarmalary medıtsınalyq uıymdardyń naqty qajettilikterin, jetkizý kólemderi men kestelerin eskere otyryp ótinimderin usyndy.
— 2027 jyly 2 174 ataýdaǵy dárilik zattar men medıtsınalyq buıymdardy satyp alý josparlanyp otyr. 2026 jylmen salystyrǵanda qarjylandyrý kólemi 18,17%-ǵa artty, — delingen habarlamada.
Qarjylandyrý kóleminiń ulǵaıýy azamattardy qoljetimdi ári sapaly medıtsınalyq kómekpen qamtamasyz etýge baǵyttalǵan memlekettik saıasattyń basymdyǵyn kórsetedi.
Qazaqstan Respýblıkasy Konstıtýtsııasynyń jańa redaktsııasyndaǵy áleýmettik mindettemelerdi iske asyrý aıasynda memleket halyqty dárilik qamtamasyz etý baǵdarlamalaryn qajetti qarjylyq resýrstarmen júıeli túrde qamtamasyz etýde.
— Densaýlyq saqtaý mınıstrligi men óńirlik densaýlyq saqtaý basqarmalary ótinimderdi qabyldaý naýqanyn kóktemde bastaǵanynyń arqasynda biz qajettilikti aldyn ala qalyptastyryp, satyp alý rásimderin dástúrli merzimnen erterek bastaýǵa múmkindik aldyq. Bizdiń basty mindetimiz — dárilik zattar men medıtsınalyq buıymdardyń medıtsınalyq uıymdarǵa ýaqytyly jetkizilýin qamtamasyz etý jáne jetkizilimdegi úzilister táýekelin boldyrmaý. Jeltoqsan aıynda dárilik zattar men medıtsınalyq buıymdar operatsııalyq qoımalarǵa bólinip jetkiziledi, al 2027 jyldyń qańtar aıynyń basynan bastap elimizdiń barlyq medıtsınalyq uıymdaryna jóneltý bastalady. Bul tásil patsıentterdiń jańa jyldyń alǵashqy kúnderinen bastap qajetti emmen qamtamasyz etilýine múmkindik beredi, — dedi «SQ-Farmatsııa» JShS Basqarma tóraǵasy Nurlybek Asylbekov.
Satyp alý naýqanyn merziminen buryn bastaý — Densaýlyq saqtaý mınıstrligi men Biryńǵaı dıstrıbıýtordyń halyqty dárilik zattarmen qamtamasyz etý júıesin jetildirýge baǵyttalǵan júıeli jumysynyń bir bóligi.
Qabyldanǵan sharalar josparlaý sapasyn arttyrýǵa, jetkizilimderdiń ýaqytyly oryndalýyn qamtamasyz etýge jáne patsıentterdi dárilik zattarmen jáne medıtsınalyq buıymdarmen qamtamasyz etýdegi úzilister táýekelin barynsha azaıtýǵa múmkindik beredi.
Satyp alý naýqanynyń barysy jáne ózekti aqparatpen Qazaqstan Respýblıkasy Densaýlyq saqtaý mınıstrligi men «SQ-Farmatsııa» JShS-niń resmı aqparattyq resýrstarynda tanysýǵa bolady.
Eske sala keteıik, buǵan deıin Qazaqstanda tegin dárilerdi qaıta satýdyń 25 myńnan asa jaǵdaıy tirkelgenin jazdyq.
