2027 jyldyń sońyna deıin halyq 100 paıyz ınternetpen qamtylady — Mádıev

ASTANA. KAZINFORM — Aýyldarǵa ınternet tartýǵa eki jylǵa 323 mlrd teńgeni ınvestıtsııa qarastyryldy. Bul týraly Úkimet otyrysynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi. 

— Sońǵy úsh jylda telekommýnıkatsııa salasyna 1 trln teńgeden astam ınvestıtsııa baǵyttaldy. Búginde 20 mln-nan astam mobıldi abonent jáne 3,7 mln tirkelgen paıdalanýshy baılanys qyzmetterin qoldanyp jatyr. Internettiń ortasha jyldamdyǵy 94 Mbıt/s deńgeıine jetti. Bıyl ınternet trafıgin tutyný aıtarlyqtaı artqanyn atap ótý qajet. Onyń deńgeıi byltyrmen salystyrǵanda eki ese kóp bolady. Salany damytý 2024–2027 jyldarǵa arnalǵan «Qoljetimdi ınternet» ulttyq jobasy aıasynda iske asyrylyp otyr. 2027 jyldyń sońyna deıin halyqtyń 100%-y ınternetpen qamtylady. Internet jyldamdyǵy 100 Mbıt/s-tan asyp, optıkalyq baılanys jelileri aýyldy eldi mekenderdiń 90%-yna deıin tartylady, — dedi Jaslan Mádıev.

Onyń aıtýynsha, qazirgi ýaqytta Qazaqstanda 6 179 aýyldyq eldi meken bar. Olardyń 2606-sy magıstraldyq talshyqty-optıkalyq baılanys jelilerine (VOLS) qosylǵan. 663 aýylda jergilikti jeli bar. 2026 jyldyń sońyna deıin taǵy 3000-nan astam aýyldy magıstraldy talshyqty-optıkalyq baılanys jelisine qosý kózdelgen. Nátıjesinde, 2027 jyldyń sońyna qaraı elimizdegi 4 786 aýylda optıkalyq jeli tikeleı úılerge deıin jetkiziledi.

— Osylaısha aýyldardyń 90%-dan astamy symdy tehnologııalar arqyly joǵary jyldamdyqty ınternetke qosylady. Osy jobalardy júzege asyrý úshin 2027 jyldyń sońyna deıin jalpy kólemi 323 mlrd teńgeni quraıtyn ınvestıtsııa qarastyrylǵan. Aýyldardyń qalǵan 10 paıyzynda el halqynyń 1 paıyzdan az bóligi turady. Mundaı eldi mekender ınternetpen spýtnıktik tehnologııalar arqyly qamtamasyz etiledi, — dedi mınıstr.

Budan buryn habarlanǵandaı, «Astana — Arqalyq» baǵytynda júretin poıyzda Starlink spýtnıktik ınterneti qosyldy.