2027 jyldyń sońyna deıin ekinshi AES boıynsha kelisimge qol qoıylmaq
ASTANA. KAZINFORM — 2027 jyldyń sońyna deıin AES-terdiń jeke qajettilikteri úshin ýrannyń memlekettik strategııalyq qory qalyptastyrylmaq. Bul týraly Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
— Energetıkany damytý baǵyty aıasynda negizgi mindetterdiń biri — turaqty energııa artyqshylyǵyn qamtamasyz etý. Jańa elektr stantsııalaryn salý jáne qoldanystaǵy stantsııalardy jańǵyrtý, onyń ishinde «taza» kómirlik generatsııany jáne elektr berý jelilerin damytý jalǵasady, — dedi Serik Jumanǵarın.
Bul rette sala úshin strategııalyq baǵdar retinde eldiń 2035 jylǵa deıingi biryńǵaı uzaq merzimdi energetıkalyq teńgerim jańartylady.
— Atom salasyn damytýǵa erekshe kóńil bólinedi. 2027 jyldyń sońyna deıin AES-terdiń jeke qajettilikteri úshin ýrannyń memlekettik strategııalyq qoryn qalyptastyrý jáne «Moıynqum» AES boıynsha Úkimetaralyq kelisimge qol qoıý josparlanǵan. Sala úshin bilikti kadrlardy daıarlaý boıynsha júıeli jumys júrgiziletin bolady, — dedi mınıstr.
Eske salsaq, Memleket basshysy Qasym-Jomart Toqaev keler jyly «Balqash» atom elektr stantsııasynyń qurylysyn bastaýdy, sondaı-aq «Moıynqum» AES-iniń qurylysyn jedeldetý úshin keshendi yntymaqtastyq týraly kelisimge qol qoıýdy usyndy.
Buǵan deıin habarlanǵandaı, elimizde salynatyn ekinshi AES-ke Moıynqum ataýy beriledi.
