2027 jyldan Qazaqstan biryńǵaı saqtandyrý modeline kóshedi
ASTANA. KAZINFORM — Premer-mınıstrdiń orynbasary Qanat Bozymbaev densaýlyq saqtaý salasyndaǵy qazirgi ózgerister týraly aqparat berdi.
Onyń aıtýynsha, bul qadamdar medıtsınalyq kómektiń sapasyn jaqsartýǵa baǵyttalǵan. Premer-mınıstrdiń orynbasary mindetti medıtsınalyq saqtandyrý júıesi engizilgennen beri salany qarjylandyrý úsh esege óskenin atap ótti.
— Bıyl medıtsınalyq kómektiń biryńǵaı paketi týraly zań qabyldandy. Onda 2027 jyldan bastap biryńǵaı saqtandyrý modeline kezeń-kezeńimen kóshý kózdelgen. Osy oraıda mindettemelerdiń 35 paıyzy tegin medıtsınalyq kómektiń kepildi kólemi júıesimen jáne 65 paıyzy MÁMS júıesimen qarjylandyrylady. Salany tsıfrlandyrý aıasynda E-Densaulyk ekojúıesi damyp, 17 aqparattyq júıe ońtaılandyrylady, — dedi Qanat Bozymbaev Parlament Májilisiniń jalpy otyrysynda.
Sonymen qatar ol búkil el boıynsha densaýlyq saqtaý ınfraqurylymyn damytý jumystary júrip jatqanyn aıtty.
— Sońǵy úsh jylda Ulttyq onkologııa ortalyǵy, jedel medıtsınalyq kómek jáne juqpaly aýrýlar ortalyqtary jáne basqa da uıymdarǵa arnalǵan nysandar salyndy. Aýyldarda densaýlyq saqtaýdy jańǵyrtýdyń ulttyq jobasy aıasynda osy jyldyń sońyna deıin 655 bastapqy medıtsınalyq-sanıtarlyq kómek nysanyn aıaqtaý josparlanǵan, onyń 637-si salyndy, — dedi Úkimet basshysynyń orynbasary.
Eske salsaq, buǵan deıin keler jyldan bastap áleýmettik medıtsınalyq saqtandyrý júıesi qalaı ózgeretinin jazǵan edik.