2027 jyldan bastap jumyssyzdyq boıynsha áleýmettik tólem alý tártibi ózgeredi

ASTANA. KAZINFORM – Qazaqstanda 2027 jylǵy 1 qańtardan bastap jumysynan aıyrylǵan azamattarǵa Memlekettik áleýmettik saqtandyrý qorynan tólenetin áleýmettik tólemdi alý tártibi ózgeredi, dep habarlady Eńbek jáne halyqty áleýmettik qorǵaý mınıstrligi.

p
Foto: Eńbek mınıstrligi

Vedomstvo málimetinshe, Áleýmettik kodekske engizilgen ózgeristerdiń negizgi maqsaty – jumyssyz qalǵan azamattardyń turaqty jumysqa tezirek ornalasýyna kómektesý.

Jańa tártip boıynsha jumysynan aıyrylǵan adam aldymen mansap ortalyǵyna júginýi kerek.

2026 jylǵy 1 qazannan bastap «jumys izdep júrgen adam» mártebesinde bolý merzimi 2 kúnnen 13 kúnge deıin uzartylǵan. Osy ýaqyt aralyǵynda mansap ortalyǵynyń mamandary azamattyń kásibı tájirıbesi men daǵdylaryn zerdelep, laıyqty bos jumys oryndaryn usynady jáne jumys berýshilermen suhbattasýdy uıymdastyrady.

Eger 13 kún ishinde laıyqty jumys tabylmasa, azamatqa resmı túrde jumyssyz mártebesi beriledi. Budan keıin de mansap ortalyǵy jumys izdeýdi jalǵastyrady. Qajet bolǵan jaǵdaıda qysqa merzimdi kásiptik oqýdan ótý usynylady.

– Jumyssyz mártebesin alǵannan keıin áleýmettik tólem taǵaıyndaýǵa ózińizge yńǵaıly tásilmen ótinish bere alasyz. Ótinishti eGov.kz portaly, Elektrondyq eńbek bırjasy (Enbek.kz) nemese ekinshi deńgeıdegi bankterdiń mobıldi qosymshalary arqyly berýge bolady. Uıaly telefonyńyzǵa kelgen SMS-habarlama arqyly proaktıvti qyzmetti de paıdalana alasyz. Budan bólek, mansap ortalyǵyna nemese «Azamattarǵa arnalǵan úkimet» memlekettik korporatsııasynyń bólimshesine baryp, ótinish bere alasyz, – delingen mınıstrlik aqparatynda.

2027 jyldan bastap áleýmettik tólem azamattyń belsendi túrde jumys izdeý kezeńine taǵaıyndalady. Onyń tólený uzaqtyǵy mindetti áleýmettik saqtandyrý júıesine qatysý ótiline baılanysty bolady jáne 3 aıdan aspaıdy.

Al tólem mólsheri sońǵy eki jyldaǵy ortasha aılyq tabystyń 45%-yn quraıdy. Bul rette esepke alynatyn ortasha aılyq tabys eń tómengi jalaqynyń jeti eselengen mólsherinen aspaýǵa tıis.

Memleket basshysynyń Joldaýyna sáıkes, 2027 jylǵy 1 qańtardan bastap eń tómengi jalaqy 85 myń teńgeden 110 myń teńgege deıin ósedi. Osyǵan baılanysty jumysynan aıyrylý jaǵdaıy boıynsha áleýmettik tólemniń eń joǵary mólsheri de aıyna 346,5 myń teńgege deıin ulǵaıady.

Mınıstrlik atalǵan tólemdi burynǵydaı mindetti áleýmettik saqtandyrý júıesine qatysýshylar ǵana ala alatynyn eskertti.

Sonymen qatar áleýmettik tólem taǵaıyndalǵannan keıin de mansap ortalyǵy azamatqa laıyqty jumys izdeýdi jalǵastyrady.

Aıta keteıik, buǵan deıin jumysynan aıyrylǵandarǵa tólenetin áleýmettik tólemniń merzimi 2027 jylǵy 1 qańtardan bastap úsh aıǵa deıin qysqaratyny habarlanǵan edi. Al 2026 jylǵy 1 qazannan bastap jumyspen qamtý qyzmetin jetildirýge baǵyttalǵan pılottyq joba iske qosylǵan.