2027 jyldan bastap josparly akkredıtteý baǵalaýlary onlaın formatta ótedi
ASTANA. KAZINFORM — Qazaqstandaǵy zerthanalar, sertıfıkattaý jáne ınspektsııalyq uıymdar mindetti baǵalaýdyń bir bóligin qashyqtan óte bastady.
QR SIM TKRM Ulttyq akkredıtteý ortalyǵy 32 qashyqtan baǵalaý júrgizip, tsıfrlyq format protsedýralardyń joǵary deńgeıdegi obektıvtiligin, táýelsizdigin jáne sapasyn saqtaýǵa múmkindik beretinin dáleldedi.
Qashyqtan baǵalaýǵa ótý ulttyq akkredıtteý júıesin tsıfrovızatsııalaýdyń kezekti kezeńi boldy. Jańa mehanızm bıznes úshin ýaqyt pen uıymdastyrýshylyq shyǵyndardy azaıtady, ákimshilik júktemeni tómendetedi jáne memlekettik resýrstardy tıimdirek paıdalanýǵa yqpal etedi. Bul rette akkredıtteýdiń táýelsizdik, quzyrettilik jáne nátıjelerdiń shynaıylyǵy sııaqty negizgi qaǵıdattary ózgerissiz qalady.
Sarapshylar atap ótkendeı, 2026 jyly qashyqtan baǵalaý ekinshi josparly baǵalaý kezinde pılottyq rejımde júrgiziledi. Al 2027 jyly Ulttyq akkredıtteý ortalyǵy bul tájirıbeni keńeıtip, qashyqtan baǵalaý formatyn barlyq josparly baǵalaýlarǵa taratýdy josparlap otyr.
Sonymen qatar, baǵalaýdy qashyqtyq formatynda júrgizý mindetti bolyp tabylmaıdy. Mundaı mehanızm belgilengen krıterıılerge sáıkes keletin jáne qashyqtan ózara árekettesý úshin qajetti tehnıkalyq múmkindikteri bar akkredıtteý sýbektilerine qatysty ǵana qoldanylady.
Jańa formatty engizý úshin Ortalyq ádistemelik qujattar toptamasyn ázirledi, onyń ishinde «Qashyqtan baǵalaý» jumys nusqaýlyǵy, baǵalaýshylarǵa arnalǵan usynymdar jáne akkredıtteý sýbektilerine arnalǵan keri baılanys saýalnamasy bar. Bul qashyqtan baǵalaýdy júrgizýge biryńǵaı, ashyq ári túsinikti tásildi qamtamasyz etýge, sondaı-aq is-tájirıbe men protsess qatysýshylarynyń keri baılanysyn eskere otyryp, mehanızmdi jetildirýge múmkindik beredi.
