2027 jyldan bastap zeınetaqy júıesinde ne ózgeredi
ASTANA. KAZINFORM — Mindetti zeınetaqy jarnalarynyń saqtalýyna beriletin memlekettik kepildik tolyq kólemde saqtalady. Bul norma Qazaqstan Respýblıkasynyń Áleýmettik kodeksinde bekitilgen jáne oǵan eshqandaı ózgeris engizilmeıdi.
2027 jyldan bastap memlekettik kepildiktiń ózi emes, zańnamada kózdelgen ótemaqy tólemderiniń birin júzege asyrý tetigi ózgeredi. Bul rette mindetti zeınetaqy jarnalarynyń saqtalýyna beriletin memlekettik kepildik Qazaqstan Respýblıkasynyń Áleýmettik kodeksine sáıkes tolyq kólemde óz kúshinde qalady.
Atalǵan ózgerister jınaqtaýshy zeınetaqy júıesiniń damýyna jáne azamattardyń óz zeınetaqy jınaqtaryn basqarý múmkindikteriniń keńeıýine baılanysty engizilýde.
Jınaqtaýshy zeınetaqy júıesiniń bastapqy kezeńinde zeınetaqy aktıvterin ınvestıtsııalyq basqarýdy tek memleket júzege asyryp, ınvestıtsııalyq sheshimderdi ózi qabyldap, olardyń nátıjesine tolyq jaýapty boldy. Osyǵan baılanysty ınvestıtsııalyq kiris pen ınflıatsııa deńgeıi arasyndaǵy aıyrmany óteý tetigi engizilgen bolatyn.
Qazirgi ýaqytta zańnama azamattarǵa ózderiniń zeınetaqy jınaqtarynyń 100 paıyzyna deıin ınvestıtsııalyq portfeldi basqarýshynyń senimgerlik basqarýyna berý quqyǵyn qarastyrady. Buǵan deıin bul múmkindik jınaqtardyń 50 paıyzyna deıin ǵana shektelgen bolatyn.
Tańdaý múmkindiginiń keńeıýi salymshynyń zeınetaqy aktıvterin basqarý úderisine tikeleı qatysýyn bildiredi. Azamattar endi basqarýshy kompanııany, ınvestıtsııalyq strategııany jáne ózderi úshin qolaıly ınvestıtsııalyq táýekel deńgeıin derbes tańdaı alady. Osyǵan baılanysty azamattardyń tańdaý múmkindikterin keńeıte otyryp, jınaqtaýshy zeınetaqy júıesiniń jumys isteý tetigi odan ári jetildirilýde.
Sonymen qatar zeınetaqy jınaqtarynyń saqtalýy qoldanystaǵy zańnama talaptaryna sáıkes tolyq qamtamasyz etiledi.
Qazaqstan Respýblıkasynyń Ulttyq Banki zeınetaqy aktıvterin olardyń saqtalýyn qamtamasyz etý jáne uzaq merzimdi tabystylyqqa qol jetkizý mindetterin basshylyqqa ala otyryp basqarýdy jalǵastyrady. Qazaqstan Respýblıkasy Ulttyq Bankiniń 2024–2028 jyldarǵa arnalǵan strategııalyq josparyna sáıkes zeınetaqy aktıvterin basqarýdyń negizgi maqsattarynyń biri – uzaq merzimdi perspektıvada ınflıatsııa deńgeıinen joǵary tabystylyqty qamtamasyz etý.
Investıtsııalyq portfeldi basqarýshylarǵa qatysty zańnamada qarjylyq turaqtylyqqa, menshikti kapıtaldyń jetkiliktiligine jáne kásibı tájirıbege qoıylatyn talaptar belgilengen. Sonymen qatar zańnamada kózdelgen jaǵdaılarda eń tómengi kiristilik deńgeıine qol jetkizilmegen jaǵdaıda, basqarýshy kompanııa tıisti aıyrmany óz qarajaty esebinen óteýge mindetti.
Osylaısha engizilip otyrǵan ózgerister jınaqtaýshy zeınetaqy júıesiniń damý deńgeıin, azamattardyń tańdaý múmkindikteriniń keńeıýin jáne naryqtyń kásibı qatysýshylarynyń jaýapkershiligin arttyrýdy eskere otyryp, zeınetaqy jınaqtaryn basqarý tetikterin odan ári jetildirýge baǵyttalǵan. Bul rette Qazaqstan Respýblıkasynyń zańnamasynda kózdelgen memlekettik kepildikter tolyq kólemde saqtalady.
Aıta ketelik qyrkúıekten bastap qazaqstandyqtar BJZQ-daǵy zeınetaqy jınaǵyn tolyq kólemde jeke basqarýshy kompanııalarǵa bere alady. Ulttyq bank tóraǵasy Tımýr Súleımenov mundaı tańdaý kezinde neni eskerý keregin aıtqan edi.
