2027 jyldan bastap ósimdik maıyn satýǵa jańa talaptar engiziledi
ASTANA. KAZINFORM — 2027 jylǵy 1 sáýirden bastap Qazaqstanda ósimdik maılary men maı ónimderiniń jekelegen túrlerin mindetti túrde tańbalaý jáne olardyń aınalymyn qadaǵalaý tártibi engiziledi. Tıisti qaǵıdalardy Aýyl sharýashylyǵy mınıstri 2026 jylǵy 16 qarashadaǵy buıryǵymen bekitti.
Jańa talapqa sáıkes, ónimderdiń qaptamasyna eki ólshemdi DataMatrix shtrıhkody qoıylady. Bul kod arqyly taýardyń óndirilgen nemese elge ákelingen sátinen bastap tutynýshyǵa satylǵanǵa deıingi qozǵalysyn baqylaýǵa bolady.
Qazaqstandyq óndirýshiler ónimdi satýǵa nemese ótkizý úshin basqa tulǵaǵa berýge deıin tańbalaýǵa mindetti. Al ımporttaýshylar shetelde shyǵarylǵan taýarlarǵa Qazaqstanǵa ákelingenge deıin nemese olardy ishki tutyný úshin shyǵarý ne keri ımporttaý kedendik rásimderine ornalastyrǵanǵa deıin arnaıy kod qoıýǵa tıis.
Jańa júıemen jumys isteý úshin óndirýshiler, ımporttaýshylar men satýshylar taýarlardy tańbalaý jáne qadaǵalaý jónindegi tsıfrlyq júıege tirkelýi qajet. Sondaı-aq olar tıisti jabdyqtardy júıege qosyp, ónimniń tańbalanýy, aınalymǵa shyǵarylýy, tasymaldanýy jáne satylýy týraly málimetterdi engizýge mindetteledi.
Óndirýshiler, ımporttaýshylar jáne kóterme saýdamen aınalysatyn kásipkerler óz jabdyqtarynyń tsıfrlyq júıemen baılanys ornatýǵa daıyn bolýyn qamtamasyz etýi tıis. Eger jabdyqty júıege tikeleı qosý múmkin bolmasa, qajetti málimetterdi jeke kabınet arqyly jiberýge bolady.
Bólshek saýda oryndaryna da qosymsha talaptar qoıylady. Dúkender júıege tirkelip qana qoımaı, málimetterdi tirkep, joldaı alatyn baqylaý-kassa mashınalarymen jáne DataMatrix kodtaryn oqıtyn qurylǵylarmen jabdyqtalýy kerek. Sonymen qatar fıskaldy derekter operatorymen kelisimshart jasasýy qajet.
Tańbalanǵan ónim satylǵan kezde kassada onyń kody skanerlenip, fıskaldyq chekke engiziledi. Taýardyń satylǵany týraly aqparat fıskaldyq derekter operatory arqyly avtomatty túrde tsıfrlyq júıege túsedi.
Jańa qaǵıdalar ónimniń bir kásipkerden ekinshisine berilýin, tasymaldanýyn, qabyldanýyn jáne qaıtarylýyn da qamtıdy. Sondaı-aq taýardy qaıta aınalymǵa shyǵarý, kádege jaratý jáne ózge de sebeptermen aınalymnan shyǵarý týraly málimetter júıede tirkelýi tıis.
Qujatta birqatar merzim de belgilengen. Atap aıtqanda, júıe operatory kásipkerdi 24 saǵat ishinde tirkeýi kerek. Al tańbalaý kodtary tıisti ótinim tirkelgennen keıin tórt saǵat ishinde berilýge tıis. Alynǵan kodtardy ónimniń qaptamasyna túsirip, bul týraly aqparatty júıege engizýge bir jyl ýaqyt beriledi. Osy merzimde paıdalanylmaǵan kodtardyń kúshi joıylady.
Ónim basqa kásipkerge berilgen nemese jóneltilgen jaǵdaıda, tıisti málimetter sol kúnnen keshiktirilmeı júıege engizilýi qajet. Al taýardy qabyldaǵan tarap onyń qabyldanǵanyn aınalym týraly aqparat tirkelgen kúnnen bastap 15 jumys kúni ishinde rastaýǵa mindetti.
Jańa talaptar kúshine engenge deıin óndirilgen, biraq tańbalanbaǵan ósimdik maılary men maı ónimderin jaramdylyq merzimi aıaqtalǵanǵa deıin satýǵa ruqsat etiledi.
Aýyl sharýashylyǵy mınıstriniń buıryǵy 2027 jylǵy 1 sáýirden bastap kúshine enedi.
Aıta keteıik, buǵan deıin 2027 jyldan bastap jumyssyzdyq boıynsha áleýmettik tólem alý tártibi ózgeretini habarlandy.