2027 jyldan bastap Mysyrǵa vıza rásimdeý 39 dollarǵa deıin qymbattaıdy
ASTANA. KAZINFORM – Mysyr shetel azamattarynyń elge kirýine baılanysty vızalyq alymdar men qyzmet aqysyn tóleý tártibin qaıta qaraıdy, dep habarlaıdy Kazinform agenttiginiń menshikti tilshisi.
2027 jylǵy 1 qańtardan bastap Mysyrǵa bir rettik kirý vızasynyń bazalyq quny 3 dollarǵa (1 344 teńge) ósip, 30 dollardan (13 436 teńge) 33 dollarǵa (14 779 teńge) deıin qymbattaıdy.
Bul týraly Mysyrdyń Akhbar Al-Youm basylymy eldiń Týrıstik kompanııalar men agenttikter palatasy taratqan resmı nusqaýǵa silteme jasap habarlady.
Buǵan qosa týrısterden qyzmet kórsetý jáne qujat rásimdeý úshin 6 dollar (2 687 teńge), sondaı-aq bank komıssııasy men salyqtar alynady. Osylaısha bir rettik vızanyń jalpy quny 39 dollarǵa (17 466 teńgeni) jetedi.
Tranzıttik vızany rásimdeý alymy da 3 dollarǵa (1 344 teńge) ósedi. Alaıda onyń naqty qansha bolatyny habarlamada kórsetilmegen.
Mysyr úkimeti tarıfterdi qaıta qaraý týraly sheshimdi 2026 jylǵy 13 tamyzda qabyldaǵan. Bul ózgeristerdiń egjeı-tegjeıi týrıstik naryq ókilderine joldanǵan Týrıstik kompanııalar men agenttikter palatasynyń №173 resmı nusqaýynda kórsetilgen.
Palata týrıstik kompanııalarǵa jańa tarıfterdi eskerip, sheteldik seriktesteri men saıahatshylarǵa ózgerister týraly aqparat berýdi tapsyrdy.
Jyl basynda Mysyrda 1 naýryzdan bastap sheteldikter úshin vıza aqysy 25 dollardan 30 dollarǵa deıin kóterilgenin habarlaǵan edik.
