2027 jyldan bastap Qazaqstan men Ázerbaıjan e-Permit júıesine tolyq kóshedi
ASTANA. KAZINFORM – Qazaqstan men Ázerbaıjan 2027 jyldan bastap avtotasymaldarǵa arnalǵan ruqsattardy tolyqtaı elektrondy formatqa kóshiredi.
Baký qalasynda Halyqaralyq avtomobıl qatynasy máseleleri jónindegi Qazaqstan-Ázerbaıjan aralas komıssııasynyń kezekti otyrysy ótti.
Otyrys qorytyndysy boıynsha taraptar 2027 jyldan bastap qaǵaz túrindegi ruqsat blankilerinen tolyqtaı bas tartyp, e-Permit júıesi arqyly ruqsattardy rásimdeý men almasýdy tolyq elektrondyq formatqa kóshirý týraly kelisimge keldi. Bul sheshim tsıfrlyq tehnologııalardy engizýdiń oń tájirıbesi men halyqaralyq avtomobıl tasymaldarynda elektrondyq ruqsattardy qoldanýdyń tıimdi nátıjelerin eskere otyryp qabyldandy.
Otyrys barysynda elektrondyq qujat aınalymyna kóshý ákimshilik rásimderdi ońtaılandyryp, tasymaldaý úderisiniń ashyqtyǵyn arttyrýǵa jáne halyqaralyq tasymaldardy rásimdeý ýaqytyn qysqartýǵa múmkindik beretini atap ótildi.
Sondaı-aq taraptar ekijaqty jáne tranzıttik júk tasymaldaryn damytýǵa qatysty ózekti máselelerdi talqylady. Kezdesý barysynda eki el arasyndaǵy júk tasymaly kóleminiń turaqty ósip kele jatqany, sondaı-aq Qazaqstan men Ázerbaıjannyń halyqaralyq kólik dálizderin damytýda mańyzdy ról atqaratyny atap ótildi.
Tasymaldaýshylardyń ósip kele jatqan suranysyn qamtamasyz etý maqsatynda taraptar 2026 jylǵa qosymsha 6 000 elektrondyq ruqsatpen ózara almasýǵa kelisti.
Sonymen qatar, 2027 jylǵa arnalǵan ruqsattardyń aldyn ala kvotasy 28 000 birlik kóleminde kelisildi. Bul aldyńǵy kezeńmen salystyrǵanda 12 000-ǵa artyq. Kvotanyń ulǵaıýy halyqaralyq avtomobıl tasymaldaryna suranysty qamtamasyz etýge jáne Qazaqstan men Ázerbaıjan arasyndaǵy saýda-ekonomıkalyq yntymaqtastyqtyń odan ári damýyna yqpal etedi.
Otyrys qorytyndysy boıynsha taraptar kólik salasyndaǵy yntymaqtastyqty odan ári nyǵaıtýǵa daıyn ekendikterin rastap, Qazaqstan men Ázerbaıjan arasyndaǵy halyqaralyq avtomobıl tasymaldary salasyndaǵy áriptestikti damytýdyń mańyzdylyǵyn atap ótti.
Aıta ketelik Ázerbaıjan júk tasymaldaý kólemin eki esege arttyrmaqshy.
