2027 jyldan bastap kásipkerlerdi qoldaý sharalarynyń tizimi qysqarady

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Májilis depýtatynyń saýalyna joldaǵan jaýapta memleket bıznesti qoldaýdyń strategııalyq tásili qolǵa alynǵanyn málim etti.

- Bıznesti memlekettik qoldaýdyń biryńǵaı strategııalyq tásilin qalyptastyrý jumysy bastaldy. Qoldanystaǵy sharalarǵa revızııa júrgizilip, memlekettik qoldaý sharalarynyń biryńǵaı tizilimi qalyptastyryldy. Olardyń tıimdiligin baǵalaıtyn ókilettikter Ulttyq ekonomıka mınıstrligine berildi.

Memlekettik qoldaý sharalarynyń nátıjeliligin baǵalaý kiristerdiń ósýin, jalpy ónim kólemin, eńbek ónimdiligin, salyq túsimderin, eksportty jáne jumys oryndaryn qurýdy qosa alǵanda, ólshenetin kórsetkishterge negizdeledi. Búgingi tańda Qarjy mınıstrliginiń aqparattyq júıelerinde bıznes sýbektileriniń mártebesi, salyq júktemesi, basqa qoldaý sharalaryna qatysýy jáne bıýdjet kórsetkishteri týraly tolyq jáne senimdi aqparat bar. Bul árbir sharanyń tıimdiligin obektıvti baǵalaýǵa múmkindik beredi, - dep jazylǵan jaýapta.

Qoldaý sharalarynyń tıimdiligin baǵalaý úshin memlekettik organdar men operatorlardyń aqparattyq júıelerin «Baqylauda» aqparattyq júıesine ıntegratsııalaý arqyly, eki deńgeıli júıe negizdelgen tsıfrlyq monıtorıng engizilip otyr.

- Jeke baǵalaý alynǵan qoldaýdy qarsy mindettemelerdi oryndaýmen salystyrý arqyly júrgiziletin bolady. Monıtorıng nátıjelerin UEM memlekettik qoldaý sharalarynyń tıimdiligin taldaý kezinde paıdalanady jáne olardy jetildirý ne tıimsiz quraldardy alyp tastaý jóninde usynystar ázirleı otyryp, Úkimet janyndaǵy kásipkerlik qyzmetti retteý máseleleri jónindegi vedomstvoaralyq komıssııanyń otyrystarynda jyl saıyn qaralady. Qazir 2027 jylǵy 1 qańtardan bastap tizilimge engizilmegen sharalardy usynýǵa tyıym salýdy jáne Qarjymınine monıtorıng boıynsha ókilettikter berýdi qosa alǵanda, osy tásilderdi zańnamalyq bekitý boıynsha jumys júrgizilip jatyr. Tıisti túzetýler Tsıfrlyq kodekske ilespe Zańynda kózdelgen, - dep jazady Serik Jumanǵarın.

Buǵan deıin bıznesti memlekettik qoldaý sharalaryna júrgizilgen aýdıt qorytyndysy boıynsha 14 materıal quqyq qorǵaý organdaryna joldanǵanyn jazǵan edik.