2027 jyldan bastap qaryz alýshylarǵa jańa lımıt engizilýi múmkin

Ulttyq bank 2027 jylǵy 1 qańtardan bastap qaryz alýshynyń kirisine qatysty borysh koeffıtsıentiniń (KBK) shekti mánin belgileýdi josparlap otyr. Tıisti norma «Makroprýdentsııalyq normatıvter men lımıtter, olardyń normatıvtik mánderin jáne esepteý ádistemesin belgileý týraly» qaýly jobasy aıasynda ázirlengen.

Vedomstvonyń málimetinshe, KBK 2024 jylǵy tamyzdan bastap retteýshilik tájirıbe retinde monıtorıng rejıminde qoldanylyp keledi. Bul kórsetkish qaryz alýshynyń barlyq ótelmegen qaryzdary men mıkrokredıtterin, sonyń ishinde jańa josparlanyp otyrǵan nesıeni qosa alǵanda, onyń jyldyq tabysymen araqatynasyn kórsetedi.

Qarapaıym tilmen aıtqanda, KBK azamattyń jalpy qaryz júktemesiniń onyń jyldyq kirisine shaqqandaǵy deńgeıin anyqtaıdy. Kórsetkishtiń joǵary bolýy qaryz júktemesiniń artýyn jáne tólem qabiletine qatysty táýekeldiń kúsheıýin bildiredi.

Ulttyq banktiń túsindirýinshe, jańa qural bankterdiń jaýapty nesıe berý saıasatyn kúsheıtýge, halyqtyń shamadan tys qaryzdanýyn azaıtýǵa jáne qarjy júıesiniń turaqtylyǵyn arttyrýǵa baǵyttalǵan.

— Josparǵa sáıkes, 2027 jyldan bastap qaryz alýshynyń jalpy bereshegi boıynsha KBK-nyń shekti deńgeıi jyldyq 8 tabys mólsherinde belgilenbek. Sonymen qatar avtokredıt, ıpoteka jáne kepilsiz tutynýshylyq nesıeler boıynsha KBK kórsetkishine monıtorıng jalǵasady, alaıda olar úshin jeke shekti mánder engizilmeıdi, — delingen habarlamada.

Qajet bolǵan jaǵdaıda Ulttyq bank nesıe túrleri boıynsha saralanǵan shekteýler engizýge nemese jalpy shekti deńgeıdi qaıta qaraýǵa quqyly bolady.

Retteýshi organ qazirgi qoldanystaǵy boryshtyq júkteme koeffıtsıentine (BJK) qatysty talaptardy ózgertý josparlanbaǵanyn da naqtylady.

Ulttyq bank qaýly jobasynyń tolyq mátinimen resmı saıt arqyly tanysýǵa bolatynyn habarlady.

Budan buryn Ulttyq bank tsıfrlyq teńgeni shyǵarý jáne aınalymǵa engizý qaǵıdalaryn bekitti.