2027 jyldan bastap azamattar saqtandyrýsyz qandaı medıtsınalyq qyzmetterdi ala alady
ASTANA. KAZINFORM — 2027 jyldan bastap qazaqstandyqtar medıtsınalyq saqtandyrýy bolmasa da, birqatar medıtsınalyq qyzmetti tegin ala alady. Densaýlyq saqtaý mınıstrligi osyndaı ózgeris engizýdi usynyp otyr.
Tıisti túzetýler alǵashqy medıtsınalyq-sanıtarııalyq kómekti uıymdastyrý standartyna ózgerister engizý týraly buıryq jobasynda qarastyrylǵan.
MÁMS bolmasa, qandaı medıtsınalyq qyzmetter qoljetimdi bolady
Qujat jobasyna sáıkes, azamattar emhanaǵa alǵash júgingen kezde medıtsınalyq saqtandyrýy bolmasa da, birqatar qyzmetti ala alady.
Olardyń qatarynda:
- qan men zárdiń jalpy taldaýy;
- qan qysymyn jáne densaýlyq jaǵdaıynyń negizgi kórsetkishterin ólsheý;
- elektrokardıografııa (EKG);
- pýlsoksımetrııa, ıaǵnı qandaǵy ottegi deńgeıin anyqtaý;
- flıýorografııa;
- jekelegen fýnktsıonaldyq zertteýler;
- qursaq qýysy aǵzalary men búırektiń ýltradybystyq zertteýi (ÝDZ) bar.
— Osylaısha, azamattar emhanaǵa alǵash júgingen kezde atalǵan medıtsınalyq qyzmetterdi alý úshin MÁMS júıesinde saqtandyrylǵan bolýy mindetti emes, — delingen buıryq jobasynda.
Bul ózgerister emhanalar deńgeıinde medıtsınalyq kómektiń biryńǵaı paketine kóshýge baılanysty usynylyp otyr.
Mınıstrliktiń túsindirýinshe, jańa tártip negizgi medıtsınalyq qyzmetterdiń qoljetimdiligin arttyrýǵa jáne medıtsınalyq qyzmetterdiń ártúrli kómek paketterinde qaıtalanbaýyna múmkindik beredi.
Sonymen qatar Densaýlyq saqtaý mınıstrligi patsıentterge avtomatty túrde qońyraý shalý júıesin engizýdi usynyp otyr. Medıtsınalyq aqparattyq júıelerge qosylǵan arnaıy baǵdarlamalar azamattarǵa ózdiginen habarlasyp, qajetti aqparatty jetkize alady. Bul emhana qyzmetkerleriniń jumys júktemesin azaıtýǵa baǵyttalǵan.
Buıryq jobasy 23 qazanǵa deıin «Ashyq NQA» portalynda qoǵamdyq talqylaýǵa usynylǵan.
Buǵan deıin alǵashqy medıtsınalyq-sanıtarııalyq kómek standartynyń jańa redaktsııasynda qazaqstandyqtardyń tekserý nátıjelerin emhanaǵa qaıta barmaı-aq alýyna múmkindik beretin norma qarastyrylǵanyn jazdyq.
Aıta keteıik, buǵan deıin elimizde emhanalardyń jumysyn baǵalaý júıesi ózgeretini habarlandy.
