2027 jyldan bastap avtonesıe berý talaptary ózgerýi múmkin
ASTANA. KAZINFORM - Ulttyq bank tóraǵasy Tımýr Súleımenov Ónerkásip jáne qurylys mınıstrliginiń avtonesıe rásimdeý kezinde boryshtyq júkteme koeffıtsıentin esepke almaý týraly usynysyna pikir bildirdi.
Ulttyq bank basshysy boryshtyq júkteme koeffıtsıenti nesıe alýshyny shamadan tys qaryzǵa batýdan qorǵaıtyn negizgi tetik ekenin aıtty. Onyń sózinshe, bul talap tek avtonesıege emes, barlyq nesıe túrine ortaq qoldanylady.
– Mysaly, siz 10 mıllıon teńgege kólik aldyńyz delik. Bir jyl tólegennen keıin jumystan aıyrylyp nemese basqa sebeppen nesıeni tóleı almaı qaldyńyz. Mundaı jaǵdaıda bank kólikti naryqtaǵy qazirgi baǵamen alady. Biraq nesıe tolyq jabylmaýy múmkin. Sonyń saldarynan kóliksiz de qalasyz, ústińizde ótelmegen qaryz da saqtalady. Osyndaı jaǵdaılardyń aldyn alý úshin makroprýdentsııalyq retteý quraldary engizilgen. Onyń tutynýshylyq nesıe me, avtonesıe me, álde ıpoteka ma – aıyrmashylyǵy joq, – dedi Tımýr Súleımenov.
Onyń aıtýynsha, sońǵy úsh jylda Qazaqstandaǵy avtonesıe portfeli shamamen 60%-ǵa ósken. Sonymen qatar mundaı nesıelerdiń sapasy da birshama nasharlaǵan. Qazir úshinshi satydaǵy, ıaǵnı qaıtarylý qaýpi joǵary nesıelerdiń úlesi 5,7%-ǵa jetken.
– Keıbir bankter qaıtarylýy kúmándi mundaı nesıelerdi esepten shyǵara bastady. Degenmen, ázirge eshqandaı sheshim qabyldanǵan joq. Boljam boıynsha, 2027 jylǵy 1 qańtardan bastap avtonesıelerge boryshtyq júkteme koeffıtsıenti belgili bir deńgeıde engiziledi. Ol jeńildeý de, qatańdaý da bolýy múmkin. Biraq avtonesıe portfeliniń sapasy jaqsaryp, onyń ósý qarqyny teńgerimdi bolsa, biz muny eskeretin bolamyz, - dedi Ulttyq bank tóraǵasy.
Eske salaıyq, buǵan deıin Ónerkásip jáne qurylys mınıstrligi avtonesıe rásimdeý kezinde boryshtyq júkteme koeffıtsıentin eseptemeýdi usynǵan edi.
