2027 jyldan bastap 1,8 mln qazaqstandyqtyń jalaqysy ózgeredi

Elorda ákimdiginiń resmı saıtynda habarlanǵandaı, elordadaǵy «Jansaıa» áleýmettik qyzmet kórsetý ortalyǵynda, № 70 mektep-lıtseıde, Eńbek mobıldiligi ortalyǵynda jáne № 6 qalalyq emhanada halyqty áleýmettik qorǵaý salasynyń ókilderimen «Jańa tarıhı kezeńdegi Qazaqstannyń ózekti mindetteri» taqyrybynda kezdesýler ótti. Kezdesýlerde áleýmettik reformalardy iske asyrý, erekshe qajettilikteri bar adamdar men aǵa býyn ókilderin qoldaý, azamattardyń ómir sapasyn jaqsartý máseleleri qozǵaldy.

Eń tómengi jalaqy 110 myń teńgege deıin kóteriledi

Qazaqstan Respýblıkasy Quryltaıynyń Qarjy jáne bıýdjet komıtetiniń tóraǵasy Olga Perepechına Prezıdent bastamalaryn zańnamalyq turǵydan qamtamasyz etý Parlamenttiń mindeti ekenin aıtty. Onyń sózinshe, reformalardy iske asyrýǵa bıýdjet qarajatymen qatar kvazımemlekettik sektordyń, ekinshi deńgeıli bankterdiń, damý ınstıtýttary men otandyq bıznestiń resýrstaryn tartý qajet.

Ol memlekettik kómekti eń aldymen ómirlik qıyn jaǵdaıǵa tap bolǵan azamattarǵa baǵyttaý kerektigin atap ótti. Sonymen qatar áleýmettik reformalar halyqqa qosymsha kedergi týdyrmaýy tıis.

Spıkerdiń aıtýynsha, 2027 jylǵy 1 qańtardan bastap eń tómengi jalaqyny 85 myń teńgeden 110 myń teńgege deıin kóterý kózdelgen. Bul ózgeris 1,8 mıllıon azamatqa, onyń ishinde bıýdjet salasynyń 370 myń qyzmetkerine áser etedi.

Olga Perepechına jalaqynyń ósýi ınflıatsııa men kommýnaldyq qyzmetter baǵasynyń qymbattaýyna baılanysty sezilmeı qalmaýy kerektigin aıtty. Osyǵan baılanysty Úkimet pen ákimdikter aldynda azyq-túlik baǵasyn turaqtandyrý jáne tarıf saıasatyn retteý mindeti tur.

Áleýmettik nysandarǵa 6,5 trln teńge baǵyttalady

Kezdesýde «Halyqtyq qurylys» baǵdarlamasyn iske asyrý máselesi de talqylandy. 2029 jyldyń sońyna deıin áleýmettik jáne ınfraqurylymdyq nysandar salýǵa Ulttyq qordan 6,5 trıllıon teńge baǵyttaý josparlanǵan.

Qarajatty bólý kezinde óńirlerdiń qajettiligi, demografııalyq boljam jáne nysandarǵa uzaq merzimdi suranys eskeriledi. Basym baǵyttardyń qatarynda densaýlyq saqtaý, bilim berý, mádenıet, sport jáne áleýmettik ınfraqurylym, sonyń ishinde ońaltý ortalyqtaryn salý bar.

Sondaı-aq tsıfrlyq qyzmetterdi paıdalaný qıyndyq týdyratyn egde jastaǵy azamattar úshin mamandardyń jeke qabyldaýyna baryp, keńes alý múmkindigin saqtaý qajettigi aıtyldy. Derbes derekterdi qorǵaý men tsıfrlyq saýattylyqty arttyrý da nazardan tys qalǵan joq.

Áleýmettik kómek alýshylardy 59 kórsetkish boıynsha baǵalaıdy

Áleýmettik kómek júıesin reformalaý máseleleri jóninde Eńbek jáne halyqty áleýmettik qorǵaý mınıstrliginiń Astana qalasy boıynsha departamentiniń basshysy Asqar Ábildauly baıandama jasady.

Onyń aıtýynsha, otbasylardyń ál-aýqatyn baǵalaýdyń jańa júıesi alty baǵyt boıynsha 59 kórsetkishti qamtıdy. Olardyń qatarynda:

• tabys pen jumyspen qamtý;

• kólik pen tehnıkanyń bolýy;

• bıznes aktıvteri;

• jyljymaıtyn múlik pen jer ýchaskeleri;

• aýyl sharýashylyǵy tehnıkasy men mal sany;

• nesıe júktemesiniń deńgeıi bar.

Jańa tártip boıynsha otbasylar áleýmettik-ekonomıkalyq jaǵdaıyna qaraı sanattarǵa bólinedi. Atap aıtqanda, jan basyna shaqqandaǵy tabysy joǵary, iri bıznesi, qymbat kóligi nemese kommertsııalyq jyljymaıtyn múlki bar aýqatty otbasylar ataýly járdemaqy almaıdy.

Al tabysy tómen, jumyssyz nemese áleýmettik turǵydan osal otbasylar memlekettik qoldaýdyń barlyq túrin alady.

Sonymen birge qazirgi ýaqytta járdemaqy alyp júrgen soǵys ardagerleri, tyl eńbekkerleri, múgedektigi bar adamdar, múgedektigi bar balalardy tárbıelep otyrǵan kópbalaly analar jáne basqa da azamattar úshin tólemder burynǵy kóleminde saqtalady.

Otbasylardyń áleýmettik jaǵdaıy ózgergen jaǵdaıda aqparattyq júıeler tólemderdi qaıta qaraýǵa múmkindik beredi. Eger qoldaý alýǵa quqyǵy paıda bolsa, járdemaqy avtomatty túrde qaıta taǵaıyndalýy múmkin. Aqparattyq júıelerdegi qatelerdi túzetý tetikteri de qarastyrylǵan.

Qoǵamdyq jaýapkershilik pen otbasy qundylyqtary

Respýblıkalyq Analar keńesiniń tóraıymy Nazıpa Shanaı qoǵamdyq jaýapkershilik, otbasynyń róli jáne adamgershilik qundylyqtardyń mańyzyna toqtaldy.

Onyń pikirinshe, memlekettik bastamalardy júzege asyrý qoǵamdyq ádepti, jeke jaýapkershilikti jáne zańǵa qurmetti nyǵaıtýmen qatar júrýi tıis. Ol shaǵyn jáne orta bıznesti qoldaý zań talaptaryn saqtaý jáne kásipkerlik jaýapkershilik qaǵıdattarymen ushtasýy kerektigin atap ótti.

Kezdesý barysynda áleýmettik saıasattaǵy ózgerister men Prezıdent tapsyrmalaryn oryndaý joldary talqylandy. Spıkerler reformalardyń basty maqsaty – ár azamatqa ádil qoldaý kórsetip, memlekettik qyzmetterdiń qoljetimdiligi men laıyqty ómir sapasyn qamtamasyz etý ekenin jetkizdi.

Buǵan deıin Máskeýde Prezıdenttiń Qazaqstan halqyna Joldaýy talqylanǵanyn jazdyq.