2027-2028 jyldary eń tómengi jalaqyny kóterý máselesi qaralady — mınıstr
ASTANA. KAZINFORM — 2027-2028 jyldary eń tómengi jalaqyny kóterý máselesi qaralady. Bul týraly Úkimet otyrysynda makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasyn tanystyrǵan Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.
— Halyqtyń tabysyn qoldaý úshin jumyspen qamtýǵa járdemdesý baǵdarlamalaryn iske asyrý jalǵastyrylady. Ekonomıkalyq belsendiligi tómen óńirlerge erekshe nazar aýdarylatyn bolady. Áleýmettik qoldaýdyń ataýlylyq baǵytyn arttyrý jóninde sharalar qabyldanady. Áleýmettik tólemderdiń ashyqtyǵy men ataýlylyq baǵytyn arttyrý úshin tsıfrlyq tehnologııalar qoldanýdy keńeıtý josparlanýda. 2027-2028 jyldary eń tómengi jalaqyny kóterý máselesi qaralady. 2026-2028 jyldary halyqtyń naqty tabysynyń ósýi jylyna orta eseppen 2-3 paıyzdan tómen emes bolady, — dedi Serik Jumanǵarın.
Onyń aıtýynsha, Úkimet kvazımemlekettik sektordy ońtaılandyrý jónindegi jumysty jalǵastyrady. 2026 jyldyń sońyna deıin kvazımemlekettik sektor sýbektilerin qurýǵa moratorıı qoldanylady.
— Bıyl Jekeshelendirýdiń 2021-2025 jyldarǵa arnalǵan keshendi josparyn iske asyrý aıaqtalýda. Odan ári ońtaılandyrýǵa usynylatyn memlekettik obektilerdiń jańa tizbesi qalyptastyryldy. Oǵan balanstyq quny 2 trln teńgeden asatyn 500-ge jýyq kompanııa kirdi. Ońtaılandyrý úsh kezeńde júzege asyrylady. Budan basqa, «Kazaqtelekom» aktsıonerlik qoǵamy men «Qazaq Green Power PLC» aktsııalaryn IPO/SPO-ǵa shyǵarý josparlanyp otyr, — dedi vıtse-premer.
Serik Jumanǵarın makroekonomıkalyq tepe-teńdikti arttyrý úshin Úkimet pen Ulttyq bank aqsha-kredıt jáne salyq-bıýdjet saıasaty arasyndaǵy ózara úılestirýdi júzege asyratynyn aıtty.
— Baǵdarlamany iske asyrýdyń basty nátıjesi halyqtyń naqty tabysynyń ósýi bolýy tıis. Jalpy, baǵdarlamany iske asyrý ekonomıkanyń turaqtylyǵyn arttyrýǵa, qarjylyq ornyqtylyqty nyǵaıtýǵa jáne orta merzimdi perspektıvada turaqty jáne sapaly ósý úshin jaǵdaı jasaýǵa múmkindik beredi, — dedi ol.
Aıta keteıik, Mınıstrler kabınetiniń músheleri halyqtyń ál-aýqatyn arttyrý jónindegi birlesken is-qımyl baǵdarlamasyn talqyǵa salyp jatyr.
Budan buryn mınıstr Kontrtsıkldik fıskaldyq saıasat memlekettik qarjynyń turaqtylyǵyn nyǵaıtatynyn aıtty.
