2026–2028 jyldary geologııalyq barlaý jumystaryna $470 mln-ǵa jýyq memleket ınvestıtsııasy salynady
ASTANA. KAZINFORM — Qazaqstan Premer-mınıstri Oljas Bektenov geologııalyq barlaý jańa ken oryndaryn ashý, mıneraldyq-shıkizat bazany keńeıtý jáne bolashaq ınvestıtsııalyq jobalardy iske qosý múmkindikterin aıqyndaıtynyn atap ótti.
— Memleket basshysy Qasym-Jomart Toqaev geologııa salasyn damytýǵa jáne eldiń resýrstyq áleýetin keńeıtýge erekshe kóńil bóledi. Osyǵan baılanysty Qazaqstanda jer qoınaýyn geologııalyq zertteýdiń aýqymdy baǵdarlamasy júzege asyrylýda. Qazirgi ýaqytta elimizdiń aýmaǵyn egjeı-tegjeıli geologııalyq kartografııalaý jumystary bastaldy. Jer qoınaýynyń geologııalyq zerttelý aýmaǵy 2 mln sharshy shaqyrymnan asady. Prezıdenttiń tapsyrmasy boıynsha 2026–2028 jyldary geologııalyq barlaý jumystaryna tek memleket tarapynan $470 mln-ǵa jýyq ınvestıtsııa salynady. Bul aldyńǵy eki onjyldyqtaǵy shyǵyndar kólemimen shamalas. Bizdiń mindetimiz – aýmaqtyń zerttelý deńgeıin arttyrýmen ǵana shektelmeı, ozyq tehnologııalarǵa, tsıfrlyq sheshimderge jáne halyqaralyq seriktestikke negizdelgen zamanaýı geologııa salasyn qalyptastyrý. Dál osy jańa ken oryndarynyń ashylýy aldaǵy ýaqytta paıdaly qazbalardy óndirý, qaıta óńdeý jáne joǵary deńgeıde óńdelgen ónimder shyǵarý baǵytyndaǵy jobalardy júzege asyrýdyń negizine aınalýy tıis, — dep atap ótti Premer-mınıstr.
Aıta keteıik, Qazaqstan JI arqyly ken barlaý tıimdiligin arttyrmaq.
