2026–2027 oqý jylyndaǵy muǵalimderge arnalǵan jańa talaptar tanystyryldy
ASTANA. KAZINFORM- «Negizgi jáne jalpy orta bilim berý: sapaly ózgerister jáne kásibı damý» respýblıkalyq jazǵy sessııasy aıasynda elimizdiń barlyq óńirinen kelgen 300 jýyq pedagogpraktıkalyq vorkshoptarǵa qatysty.
Alǵashqy vorkshopta qatysýshylar 14 pándik topqa bólinip, 2026–2027 oqý jylyndaǵy negizgi jáne jalpy orta bilim berýdegi ózgeristerdi talqylady. Pedagogter jetildirilgen úlgilik oqý baǵdarlamalarynyń erekshelikterin, oqý maqsattaryndaǵy ózgeristerdi, oqý protsesin josparlaý men ádistemelik usynymdardy qoldaný joldaryn qarastyrdy.
Ekinshi vorkshop 16 baǵyt boıynsha uıymdastyryldy. Onyń barysynda «Adal azamat» birtutas tárbıe baǵdarlamasynyń qundylyqtaryn pán mazmunyna kiriktirý tetikteri, tıimdi oqytý tásilderi, qalyptastyrýshy baǵalaý quraldary jáne jasandy ıntellekt múmkindikterin bilim berý protsesinde paıdalaný máseleleri boıynsha praktıkalyq jumystar júrgizildi.
Pándik toptarmen qatar mektep dırektorlarynyń oqý jáne tárbıe isi jónindegi orynbasarlary men pedagog-psıhologterge arnalǵan arnaıy alańdar jumys istedi. Olar ınklıýzıvti bilim berý, «Adal azamat» baǵdarlamasynyń jańa oqý jylyndaǵy basymdyqtary jáne «Jeke qaýipsizdik» kýrsy aıasyndaǵy naqty keısterdi talqylady.
Vorkshoptar pedagogterge oqý baǵdarlamalaryn ázirleýshilermen, tájirıbeli muǵalimdermen jáne sala sarapshylarymen tikeleı pikir almasyp, jańa oqý jylyndaǵy ózgeristerdi mektep tájirıbesine engizýdiń naqty joldaryn aıqyndaýǵa múmkindik berdi.
Osyǵan deıin pedagogterdiń bilimin baǵalaýǵa ótinishter qabyldaý bastalǵanyn jazdyq.
