2026–2027 oqý jylynda mektepterde jańa kýrs júrgiziledi
ASTANA. KAZINFORM — 2026-2027 oqý jylynan bastap elimizdiń orta bilim berý uıymdarynda 5-11 synyp oqýshylaryna arnalǵan «Jeke qaýipsizdik» kýrsy júrgizilip jatyr.
Onyń negizgi maqsaty — balalardyń qaýipsiz minez-qulyq daǵdylaryn qalyptastyrý, túrli qaýip-qaterdi durys baǵalaýǵa, sanaly sheshim qabyldaýǵa jáne qajet jaǵdaıda eresekterden der kezinde kómek suraýǵa úıretý.
Kýrs baǵdarlamasy oqýshylardyń jas erekshelikterin eskere otyryp ázirlengen jáne praktıkalyq sabaqtarǵa negizdelgen. Oqýshylar ómirde kezdesetin túrli jaǵdaılardy taldap, róldik oıyndar men arnaıy jattyǵýlar arqyly qaýipsiz áreket etý jáne óz emotsııalaryn basqarý daǵdylaryn meńgeredi.
— 5-8 synyp oqýshylary úshin jylyna 8 saǵat, al 9-11 synyp oqýshylary úshin 17 saǵat qarastyrylǵan. Baǵdarlama praktıkalyq jáne dıagnostıkalyq sabaqtardy qamtıdy. Joǵary synyp oqýshylary úshin qosymsha túzete-damytý baǵytyndaǵy sabaqtar ótkiziledi, — delingen mınıstrlik habarlamasynda.
Kýrs aıasynda oqýshylardyń psıhologııalyq jaǵdaıyn anyqtaýǵa baǵyttalǵan dıagnostıka júrgiziledi. Onyń nátıjeleri ár balanyń jeke qajettilikterin eskerýge jáne tıisti qoldaý jumystaryn josparlaýǵa múmkindik beredi.
Dıagnostıka qorytyndylary oqýshylarǵa baǵa qoıý nemese olardy qandaı da bir sanattarǵa bólý úshin qoldanylmaıdy.
Sabaqtardy bilim berý uıymdarynyń shtattyq pedagog-psıhologtary júrgizedi. Kýrstyń basty nátıjesi oqýshylardyń alǵan bilimderi men qaýipsizdik daǵdylaryn kúndelikti ómirde tıimdi qoldana bilýimen baǵalanady.
Aıta ketelik muǵalimderge mindetti qujattar sany 25-ten 5-ke deıin qysqaratyny týraly jazǵan edik.
