2026–2027 oqý jylyna arnalǵan mektep oqýlyqtarynyń jobasy talqylaýǵa shyǵaryldy

ASTANA. KAZINFORM – 2026 - 2027 oqý jylynda engiziletin mektep oqýlyqtarynyń jobalary Bilim berý mazmunyn saraptaý ortalyǵynyń https://talqylau.bmso.kz saıtynda qoǵamdyq talqylaýǵa shyǵaryldy, dep habarlady Oqý-aǵartý mınıstrliginiń baspasóz qyzmeti.

Oqýlyqtardy talqylaý ««Oqý ádebıetterin qoǵamdyq talqylaý» bóliminde kelesi pánder boıynsha júrgiziledi:
• 4-synyptarǵa arnalǵan: «Qazaq tili», «Orys tili» (qazaq tilinde oqytatyn mektepter úshin), «Matematıka» (qazaq jáne orys tilderinde oqytatyn mektepter úshin), «Dúnıetaný», «Ádebıettik oqý»

• 7–10 synyptarǵa arnalǵan: «Dúnıejúzi tarıhy», «Algebra», «Qazaq tili», «Hımııa», «Bıologııa», «Fızıka», «Geografııa», «Quqyq negizderi», «Shetel tilderi» (aǵylshyn, nemis, frantsýz tilderi) oqýlyqtaryn qamtıdy.

Qoǵamdyq talqylaý onlaın formatta ótkiziledi. Bul pedagogterdi, ǵalymdardy, ádiskerlerdi jáne mektep oqýlyqtarynyń sapasyna beıjaı qaramaıtyn qazaqstandyqtardyń qatysýyna múmkindik beredi.

Aıta keteıik, qoldanystaǵy zańnamaǵa sáıkes oqýlyqtar bes satyly saraptamadan ótedi: ǵylymı-pedagogıkalyq saraptama, pysyqtaý kezeńi, pılottyq mektepterde aprobatsııa, qoǵamdyq talqylaý jáne pándik saraptamalyq komıssııanyń qorytyndysy.

Qazirgi ýaqytta atalǵan oqýlyqtar qoǵamdyq talqylaýmen qatar, elimizdiń birneshe óńirinde 34 pılottyq mektepte synaqtan ótip jatyr.

Pándik saraptamalyq komıssııanyń sheshimimen barlyq kezeńnen ótken oqýlyqtar mektepterde qoldanýǵa jáne Oqý-aǵartý mınıstrligi bekitetin oqýlyqtar tizbesine engizýge usynylady.

Buǵan deıin mektepterde jańa oqýlyqtardyń aprobatsııasy bastalatynyn jazǵan edik.

Pedagogter oqýlyqtardy saraptaýǵa shaqyrylady.

Sońǵy 5 jylda oqýlyqtardy dúrkin-dúrkin ózgertý kesirinen el ekonomıkasyna 16 mlrd teńge shyǵyn kelgen. Bundaı derekti jyl basynda Joǵary aýdıtorlyq palata keltirgen edi. Jalpy mektep oqýlyqtary ne úshin jıi ózgeredi? Bıyl qaı synyptardyń oqýlyǵy jańardy? Taqyrypty Kazinform agenttigi tilshisi tarqatty.