2026 jylǵa qaraı qant shyǵarý kólemin 180 myń tonnaǵa jetkizý qajet - Premer

TALDYQORǴAN. QazAqparat – 2026 jylǵa qaraı qant shyǵarý kólemin 180 myń tonnaǵa jetkizý qajet. Jetisý oblysyna jumys sapary barysynda Kóksý qant zaýytyna barǵan Premer-Mınıstr Álıhan Smaıylov osyndaı mindet qoıdy, dep habarlaıdy QazAqparat Úkimettiń resmı saıtyna silteme jasap.

Álıhan Smaıylov memleket aq qant óndirýshilerine, onyń ishinde «aınalym shemasy» sheńberinde buryn-sońdy bolmaǵan qoldaý sharalaryn kórsetip otyrǵanyn atap ótti. Qant qyzylshasynyń egis alqaptaryn 15 myń gektarǵa deıin kezeń-kezeńimen ulǵaıtýdy kózdeıtin qant salasyn damytýdyń keshendi jospary qabyldanǵan. Atap aıtqanda, Jetisý oblysynda 2026 jylǵa qaraı jalpy jınalǵan ónim shamamen 525 myń tonnaǵa jetpek.

«Osyǵan baılanysty jańa alqaptardy óńdep, sýarmaly jerlerdi qalpyna keltirý boıynsha sharalar qabyldaý mańyzdy. Sýmen qamtamasyz etý bóliginde sý sharýashylyǵy obektilerin rekonstrýktsııalaý jónindegi sharalar kózdelgen. Qant zaýyttary da jańǵyrtylyp, 2026 jylǵa qaraı óndiriletin aq qant kólemin 180 myń tonnaǵa deıin jetkizý qajet», - dedi ol.

Munda Úkimet basshysy óńirdiń aýyl sharýashylyǵy qurylymdarynyń basshylarymen kezdesý ótkizip, sýbsıdııalaý, jer alqaptarynyń qoljetimdiligi, basqa da qoldaý sharalaryn usyný máseleleri týraly pikir almasty.

Álıhan Smaıylov Aýyl sharýashylyǵy mınıstrligine kóterilgen problemalardy taldaý jáne olardy sheshý boıynsha naqty usynystar engizýdi tapsyryp, ótken jyly memleket salany qarjylandyrýdy eki esege arttyrǵanyn jáne osy kólem bıyl da saqtalǵanyn aıtty.

Aıta ketsek, birneshe jyl buryn kásiporynda joǵary sapaly sheteldik jabdyqtar ornatylyp, jylýmen jabdyqtaý gazǵa aýystyrylǵan jáne jańa tehnıka satyp alynǵan. Ótken jyldyń qorytyndysy boıynsha zaýyt 70 myń tonnaǵa jýyq qant shyǵardy, 2023 jylǵa arnalǵan jospar – 92 myń tonna.