2026 jylǵa qaraı 191 aýyl mektebi NIS ádistemesimen oqıdy
«Memleket basshysynyń tapsyrmasyna sáıkes zııatkerlik mektepter jalpy bilim beretin mekteptermen birlese otyryp, qala men aýyl bilimi arasyndaǵy aıyrmashylyqty azaıtýǵa negizdelgen mańyzdy strategııany júzege asyrýda. Aýyl mektepterindegi bilim sapasynyń ózektiligi Nazarbaev Zııatkerlik mektepteriniń 2020 jyly aýyl mektepterin qoldaý boıynsha jobalaryn bastaýyna negiz boldy», – dedi Ánýar Janǵozın «Qazaqstan halqyna» qory uıymdastyrǵan «Bilimdi urpaq – bilimdi el» konferentsııasynda.
Onyń aıtýynsha, «Aýyldy aımaqtardaǵy tirek mektepteriniń áleýetin arttyrý» jobasynda Nazarbaev ııatkerlik mektepteri 3 negizgi baǵyt boıynsha jumys isteýde.
«Birinshi baǵyt mekteptiń qazirgi jaǵdaıy men negizgi protsesterin tolyq dıagnostıkalaý men zertteýdi qamtysa, ekinshi baǵyt ár mekteptiń anyqtalǵan problemalary negizinde tolyq ádistemelik qoldaý kórsetý. Al úshinshi baǵyt – mektepterdiń materıaldyq-tehnıkalyq bazasyn jańartýǵa negizdelgen», - dep túsindirdi ol.
Sonymen birge Ánýar Janǵozın NIS ázirlegen ádistememen oqyp jatqan 17 aýyldaǵy mektep oqýshylarynyń úlgerimi artqanyn jetkizdi.
«Jobanyń bastalǵanyna bir jylǵa jýyqtady, onyń tıimdiligin qazirden kórip otyrmyz. Pándik bilim monıtorınginiń qorytyndysy boıynsha 4-synyp oqýshylary matematıka jáne qazaq tili pánderinen úlgerimderi jaqsarǵanyn kórsetip otyr. Al 8-synyp oqýshylary 9 pánniń 7-eýinen oń dınamıkanyń bar eken kórsetedi. Bul halyqaralyq standarttarǵa sáıkes júrgizilgen zertteýlerdiń nátıjeleri. Biz osy baǵytta mekteptermen jumysty jalǵastyramyz», - dedi Ánýar Janǵozın.
Sondaı-aq aýyl oqýshylary qalada oqıtyn qatarlastarynan qalmaı robototehnıka olımpıadalaryna, pándik saıystarǵa, sporttyq jarystarǵa qatysyp, joǵary nátıjelerge qol jetkizýde. Bıylǵy NIS-tiń dástúrli Naýryz kezdesýlerinde aýyldan shyqqan 13 oqýshy 3D bıoprıntıng, aqyldy protezder jáne bıoınterfeıs salasyndaǵy ǵylymı jobalaryn usynǵan.
