2026 jylǵa deıin medıtsınalyq-sanıtarlyq alǵashqy kómek kórsetetin 435 nysan ashylady
«KVI-men kúres boıynsha epıdemııaǵa qarsy is-sharalarǵa tartylǵan densaýlyq saqtaý júıesiniń qyzmetkerlerin yntalandyrý úshin táýekel deńgeıine baılanysty aıyna 212,5 myńnan 850 myń teńgege deıingi mólsherde jalaqyǵa ústemeaqylar tóleý júzege asyrylady. Memleket basshysynyń 2020 jylǵy 1 qyrkúıektegi Qazaqstan halqyna Joldaýynda bergen tapsyrmasyna sáıkes yntalandyrý ústemeaqysyn tóleý 2020 jyldyń sońyna deıin jalǵasatyn bolady. Bul maqsatqa respýblıkalyq bıýdjetten 150 mlrd teńgege deıin bólinedi. Budan basqa, atalǵan qyzmetkerlerge KVI jáne vırýstyq pnevmonııamen aýrý nemese olardan qaıtys bolý jaǵdaılary boıynsha «Memlekettik áleýmettik saqtandyrý qory» AQ-dan birjolǵy áleýmettik tólemder tólenedi», - dedi Asqar Mamın.
Úkimet bashsysynyń atap ótýinshe, Densaýlyq saqtaý ınfraqurylymyn damytýdyń óńirlik perspektıvalyq josparlaryna sáıkes halyqqa medıtsınalyq kómektiń qoljetimdiligin qamtamasyz etý úshin 2026 jylǵa deıin medıtsınalyq-sanıtarlyq alǵashqy kómek kórsetetin 435 nysandy (2020 jyly – 197, 2021 jyly – 77, 2022 jyly – 95, 2023-2025 jyldary – 66), onyń ishinde Mańǵystaý oblysynyń Munaıly aýdanynda 150 tósektik aýdandyq aýrýhana (2020 jylǵa arnalǵan respýblıkalyq bıýdjetti aldaǵy naqtylaýǵa málimdelgen) ashý kózdelgen.
«Budan basqa, Shymkent qalasyn damytý men qurylys salýdyń keshendi josparynda 2023 jylǵa deıin Ońtústik Qazaqstan medıtsına akademııasynyń janynan 1000 tósektik kópbeıindi aýrýhana salý josparlanǵan», - dedi Premer-Mınıstr.
