2026 jyly «Bolashaq» baǵdarlamasy aıasynda 20 grant bólinedi
ASTANA. KAZINFORM – Búgin QR Ǵylym jáne joǵary bilim mınıstrliginde tórtjaqty memorandýmǵa qol qoıyldy.
Taraptar atom elektr stantsııasyn salý jáne ony odan ári paıdalaný úshin kadrlyq qamtamasyz etýdiń strategııalyq mańyzyn eskere otyryp, «Bolashaq» halyqaralyq stıpendııasy baǵdarlamasyna atom energetıkasy salasy boıynsha mamandar daıarlaýdyń jeke baǵyttaryn engizý týraly kelisimge keldi.
Memorandýmǵa QR Ǵylym jáne joǵary bilim mınıstri S.Nurbek, QR Atom energııasy agenttiginiń tóraǵasy A.Sátqalıev, «Halyqaralyq baǵdarlamalar ortalyǵy» AQ Basqarma tóraǵasy Á.Kýsmanov jáne «Qazaqstan atom elektr stantsııalary» JShS Bas dırektory E.Berdıgýlov qatysty.
Ǵylym jáne joǵary bilim mınıstrligi málimetinshe, atalǵan memorandým atom energetıkasy salasyna mamandar daıarlaý boıynsha yntymaqtastyqty kózdeıdi. Bul bastama ınjenerlik, tehnıkalyq jáne ǵylymı baǵyttar boıynsha mamandardy tartýǵa jol ashyp, Qazaqstandaǵy atom energetıkasynyń ósýine negiz bolatyn kadrlyq áleýetti nyǵaıtady.
2026 jyly «Bolashaq» baǵdarlamasy aıasynda 20 grantty pılottyq túrde bólý josparlanyp otyr. Aldaǵy ýaqytta osyndaı granttardy jyl saıyn berý kózdelgen. Baǵdarlama sheteldiń jetekshi joǵary oqý oryndarynda halyqaralyq taǵylymdamalardy, magıstrlik jáne doktoranttyq bilim berý baǵdarlamalaryn qamtıtyn bolady.
Atom salasy úshin bilikti kadr daıarlaýdyń mańyzdy tetikteriniń biri – áleýetti jumys berýshilermen ózara yqpaldastyq ornatý jáne baǵdarlama túlekterin mindetti túrde jumysqa ornalastyrý.
Osy maqsatta stıpendıat, jumys berýshi jáne «Bolashaq» baǵdarlamasynyń ákimshisi arasynda úshjaqty kelisimsharttar jasasý qarastyrylǵan.
Qazirgi ýaqytta Pennsylvania State University, Grenoble INP – UGA, Shanghai Jiao Tong University, City University of Hong Kong jáne «MIFI» Ulttyq zertteý ıadrolyq ýnıversıteti sııaqty jetekshi sheteldik joǵary oqý oryndarymen yntymaqtastyq týraly kelisimderdi pysyqtaý jumystary qarqyndy júrgiziledi.
«Bolashaq» baǵdarlamasy aıasynda atom salasyna arnalǵan maman daıarlaýdyń jeke baǵytyn engizý ınjenerler, tehnologtar, operatorlar jáne basqa da mamandardan turatyn kásibı kadrlar pýlyn qalyptastyrýǵa múmkindik beredi.
Aıta keteıik, «Bolashaq» túlegi aýylda oqýshylardy jańasha oqytyp júrgenin jazǵan edik.
Mınıstr kelesi jyldan bastap arnaıy taǵylymdama baǵdarlamasy ashylatynyn aıtqan edi.