2026 jyly zeınetaqy men járdemaqy qanshalyqty artady
ASTANA. KAZINFORM — Halyqty áleýmettik qorǵaý salasyndaǵy retteý jáne baqylaý komıteti departamentiniń basshysy Dámejan Sádýaqasova 2026 jyldyń 1 qańtarynan bastap zeınetaqy tólemderi men járdemaqylardyń qanshalyqty artatynyn túsindirdi.
«2026-2028 jyldarǵa arnalǵan respýblıkalyq bıýdjet týraly» zańǵa sáıkes, 2026 jylǵy 1 qańtardan bastap:
· Aılyq eseptik kórsetkish (AEK) — 4 325 teńge mólsherinde;
· Eń tómengi zeınetaqy — 69 049 teńge;
· Eń tómengi kúnkóris deńgeıi (ETKD) — 50 851 teńge;
· Bazalyq zeınetaqy tóleminiń eń tómengi mólsheri — 35 596 teńge;
· Jalaqynyń eń tómen mólsheri — 85 000 teńge bolady.
Keler jyldan bastap, jasy jáne eńbek sińirgen jyldary úshin zeınetaqy tólemderi alynatyn mólsherden 10%-ǵa artady. Al jasyna baılanysty jańadan taǵaıyndalǵan zeınetaqy mólsherin esepteý úshin eskeriletin eń joǵary tabys 55 AEK (237 875 teńge).
— Memlekettik bazalyq zeınetaqy mólsheri Áleýmettik kodekstiń 205-babyna sáıkes, eń tómengi kúnkóris deńgeıiniń (50 851 teńge) jańa mólsherine paıyzdyq qatynasta belgilenedi. Máselen, zeınetaqy júıesine qatysý ótili 10 jyl jáne odan az bolsa, tıisti qarjy respýblıkalyq bıýdjet týraly zańda belgilengen eń tómengi kúnkóris deńgeıiniń 70% mólsherinde bolmaq. Zeınetaqy júıesine qatysý ótili 10 jyldan artyq árbir tolyq jyl úshin — onyń mólsheri 2 paıyzǵa artady, biraq eń tómengi kúnkóris deńgeıi shamasynyń 118% aspaıtyn mólsherde beriledi. 2026 jyldyń 1 qańtarynan bastap, maksımaldy bazalyq zeınetaqy 60 005 tenge (118%) bolady, — dedi Dámejan Sádýaqasova Astana kommýnıkatsııalar qyzmetinde ótken brıfıngte.
Múgedektigine jáne asyraýshysynan aırylý jaǵdaıyna baılanysty memlekettik áleýmettik járdemaqylar, onyń ishinde medıtsınalyq-áleýmettik mekemelerde turatyn jáne túzeý mekemelerinde ornalasqan adamdar úshin 2026 jylǵy 1 qańtarda eń tómengi kúnkóris deńgeıiniń ulǵaıýyna baılanysty (50 851 teńge) artady. Mysaly jalpy aýrý boıynsha 1 toptaǵy múgedektik boıynsha járdemaqy — 111 873 teńgeni, 2 top — 89 498 teńge, 3 top — 61 022 teńge.
Memlekettik áleýmettik saqtandyrý qorynan eńbekke qabilettiliginen aıyrylý jáne asyraýshysynan aıyrylý jaǵdaıy boıynsha áleýmettik tólemder mólsheri 1 qańtardan bastap 10% artady.
Arnaýly kásiptik memlekettik járdemaqy mólsheri de 2026 jylǵy 1 qańtardan bastap ETKD mólsheriniń ulǵaıýyna baılanysty (50 851 teńge) kóteriledi,
2026 jylǵy 1 qańtardan bastap, AEK mólsheriniń artýyna baılanysty myna jádemaqylar men áleýmettik tólemderdiń mólsheri artady:
· № 1 jáne № 2 tizimder boıynsha memlekettik arnaıy járdemaqylar, jerleýge birjolǵy tólem;
· bala týýǵa baılanysty birjolǵy memlekettik járdemaqy;
· aı saıynǵy bala 1,5 jasqa tolǵansha beriletin memlekettik járdemaqy;
· aı saıynǵy bala 1,5 jasqa tolǵansha, kirisinen aıyrylý jaǵdaıy boıynsha MÁSQ-tan áleýmettik tólemder;
· birge turatyn 4 jáne odan kóp kámeletke tolmaǵan balasy, onyń ishinde 18 jasqa tolǵannan keıin bilim berý uıymdarynda oqıtyn balalary bar kópbalaly otbasylarǵa beriletin aı saıynǵy memlekettik járdemaqy;
· «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, І jáne ІІ dárejeli «Ana dańqy» ordenderimen nagradtalǵan kópbalaly analarǵa aı saıynǵy memlekettik járdemaqy;
· Semeı ıadrolyq synaq polıgonyndaǵy ıadrolyq synaqtardan zardap shekken azamattarǵa, jappaı saıası qýǵyn-súrginder qurbandaryna jáne jappaı saıası qýǵyn-súrginder qurbandarynyń balalaryna taǵaıyndalǵan, biraq tólenbegen birrettik aqshalaı ótemaqy.
Sonymen birge, 2026 jylǵy 1 qańtardan bastap, eń tómengi kúnkóris deńgeıi mólsheriniń artýyna baılanysty múgedektigi bar bala tárbıelep otyrǵan anaǵa nemese ákege, bala asyrap alýshyǵa, qorǵanshyǵa (qamqorshyǵa) tólenetin aı saıynǵy memlekettik járdemaqy jáne І top múgedektigi bar adamǵa kútim jasaıtyn adamǵa memlekettik járdemaqy mólsheri kóteriledi.
Aıta keteıik, Prezıdent aldaǵy úsh jylǵa arnalǵan bıýdjet týraly zańǵa qol qoıdy.
Jyl basynan beri qazaqstandyqtarǵa 3,5 trln teńgege zeınetaqy tólengen.