2026 jyly ıÝNESKO Mańǵystaý meshitterin Búkilálemdik mura tizimine qosý máselesin qaraıdy
ASTANA. KAZINFORM – Memleket basshysynyń Ulttyq quryltaıdyń ІІІ otyrysynda bergen tapsyrmasyna sáıkes, Ústirt jazyǵyn jáne Mańǵystaýdyń jerasty meshitterin ıÝNESKO-nyń Búkilálemdik muralar tizimine engizý jumysy kezeń-kezeńimen júrgizilip jatyr. Bul týraly Memlekettik keńesshi Erlan Qarın óziniń Telegram paraqshasynda jazdy.
Osyǵan baılanysty 17-24 qyrkúıek kúnderi Eskertkishter men tarıhı oryndardy saqtaý jónindegi halyqaralyq keńestiń (IKOMOS) saraptamalyq mıssııasy atalǵan tarıhı-mádenı mura nysanyn saraptamadan ótkizdi.
— Bul jumysqa ortalyq jáne jergilikti memlekettik organdardyń ókilderi, arheologııa jáne restavratsııa salasyndaǵy qazaqstandyq sarapshylar qatysty.
Saraptama barysynda jerasty meshitteriniń býferlik aımaǵy men shekarasyn aıqyndaý, konservatsııalaý jáne qorǵaý, týrıstik ınfraqurylymdy damytý jáne turaqty basqarý máseleleri qarastyryldy, — dep jazdy Erlan Qarın.
IKOMOS mıssııasynyń qorytyndysy boıynsha ıÝNESKO-nyń Búkilálemdik muralar tizimine engizý úshin «Mańǵystaý túbegindegi jerasty meshitteri» nomınatsııasynyń tehnıkalyq baǵalaýy bar saraptamalyq qorytyndysy daıyndalatyn boldy.
Atalǵan nysanǵa qatysty túpkilikti sheshim ıÝNESKO-nyń Búkilálemdik mura komıtetiniń 2026 jylǵy shildede ótetin otyrysynda qabyldanady.
Sondaı-aq ıÝNESKO-nyń Búkilálemdik muralar ortalyǵynda TMD aýmaǵyndaǵy alǵashqy «Ústirt jazyǵy» birlesken nomınatsııa jobasyn qarastyrý protsesi bastaldy.
Osylaısha, Ulttyq quryltaıda jarııalanǵan prezıdenttik bastamalardy naqty júzege asyrý jumystary jalǵasyp jatyr.
Aıta ketelik Aıda Balaeva «Ústirt» nysanynyń qujattamasyn ıÝNESKO-ǵa tapsyrǵan edi.