2026 jyly uıaly baılanys tarıfi ózgere me

ASTANA. KAZINFORM — Elimizdegi uıaly baılanys operatorlary keler jyly tarıfter ózgerýi múmkin ekenin málimdedi. 

Búgin Úkimet otyrysynan keıingi baspasóz máslıhatynda tilshiler operatorlardan 2026 jyly ınternetke tarıfterdiń ózgerýi múmkindigi týraly surady.

— Uıaly baılanys qyzmetterin kórsetý erejelerinde tıisti norma bar, ıaǵnı onda shyǵyndardyń artýynyń negizdemesi eskerilgen. Tarıfter elektr energııasy men jabdyqty satyp alýdy qosa alǵanda, operatordyń birqatar shyǵynyn qamtıdy. Eger bul shyǵyndar ósse, mindetti túrde tarıfke áser etedi, — dedi «Qazaqtelekom» kompanııasynyń bas ákimshilik dırektory Erjan Meıramov.

Beeline Kazakhstan holdınginiń prezıdenti Evgenıı Nastradınniń aıtýynsha, kompanııa baǵany jylyna bir retten artyq kótermeıdi.

— Keler jyly QQS ósimi bolady. Bul óz kezeginde salaǵa 35-40 mıllıard teńgege áser etetin óte mańyzdy faktor. Qańtar aıynda baǵany ózgertýdi josparlap otyrmyz. Meniń oıymsha, osy jyly tarıf kóterilmeıdi. Jalpy, ósim 15-20% shamasynda bolýy múmkin, — dedi Beeline Kazakhstan basshysy.

Sonymen qatar «Mobaıl Telekom-Servıs» basqarma tóraǵasy Aleksandr Babıchev te keler jyly tarıf ózgerýi múmkin ekenin aıtty.

— Tarıfterdiń kóterilýiniń negizgi sebebi — ınternet qyzmetine suranystyń artýy. Bul turǵyda ınfraqurylym osy salanyń damýyna tıisti qarqynda ilese almaı keledi. Operatorlar ınfraqurylymǵa jyldam qarqynmen ınvestıtsııalaýǵa májbúr. Bıýdjetti josparlaý aıasynda belgili bir draıverlerdi — ekonomıkalyq jáne salyq salasyndaǵy ózgeristerdi, ınflıatsııa deńgeıin eskeremiz. Sondyqtan tarıftik josparlardy túzetýdi qarastyryp jatyrmyz. Osy oraıda 15-20 paıyzdyq ózgeris pysyqtalady, — dedi kompanııa basshysy.

Buǵan deıin habarlanǵandaı, 2027 jyldyń sońyna deıin halyqtyń 100 paıyzy ınternetpen qamtylady.