2026 jyly Ulttyq áýe júk tasymaldaýshy kompanııasy iske qosylady
ASTANA. KAZINFORM – 2026 jyly Ulttyq áýe júk tasymaldaýshy kompanııasy iske qosylady. Bul týraly búgin Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
- Kólik-logıstıkalyq áleýetti damytý maqsatynda, myqty ınfraqurylymdyq negizdi qalyptastyrý mańyzdy. «Baqty-Aıagóz» jańa temirjol ýchaskeleri, «Sekseýil-Beıneý» avtomobıl joly jáne osylar sııaqty mańyzdy ınfraqurylymdyq jobalar iske asyrylady. 2026 jyly Smart Cargo kedendik jáne logıstıkalyq qyzmetter kórsetiletin biryńǵaı tsıfrlyq júıesi engizilip, Ulttyq áýe júk tasymaldaýshy kompanııasy iske qosylady. Qabyldanǵan barlyq is-sharany eskere otyryp, Qazaqstan arqyly júk tasymaldaý kólemi 2 esege ulǵaıady dep kútilýde, - dedi vıtse-premer.
Onyń atap ótýinshe, týrızm salasynda Almaty taý klasterin damytýǵa basa nazar aýdarylady. Nátıjesinde taý shańǵysy kýrorttarynyń ótkizý qabileti 4 esege artady. Kýrorttyq aımaqtardy keńeıtý jáne jabdyqtaý boıynsha is-sharalardy iske asyrý ishki týrızmdi damytýǵa qosymsha serpin beredi.
- Turǵyn úı-kommýnaldyq sharýashylyq (TKSh) júıesin reformalaý tsıfrlyq sheshimderdi belsendi engizý, onyń ishinde energııa tıimdiligin arttyrý arqyly iske asyrylatyn bolady. Іske qosýǵa josparlanǵan Biryńǵaı ulttyq platformasy qurylystyń barlyq kezeńinde jan-jaqty esepke alýdy, josparlaýdy jáne monıtorıng júrgizýdi qamtamasyz etýge múmkindik beredi, - dedi ol.
Vıtse-premer sý ınfraqurylymyn jańǵyrtý máseleleri sýdy únemdeý tehnologııalaryn jáne sýdy uqypty paıdalanýǵa qoıylatyn talaptardy zańnamalyq turǵydan bekitýdi kózdeıtinin aıtty.
- Budan basqa 18 sý qoımasy men 14,5 myń km ırrıgatsııalyq kanaldardy rekonstrýktsııalaý jáne 9 jańa sý qoımasynyń qurylysy boıynsha jumystar jalǵasady. Sý saıasatyn uzaq merzimdi josparlaý quraly retinde Ulttyq sý balansy qalyptastyrylady, - dedi Serik Jumanǵarın.
Aıta keteıik, otyrysta Úkimet músheleri Prezıdent Joldaýyn júzege asyrý jónindegi jalpyulttyq is-sharalar josparyn maquldady.