2026 jyly Ulan-Batyrda metro qurylysy bastalady
ASTANA. KAZINFORM — Mońǵolııanyń Ulan-Batyr qalasynda metro qurylysy qala ortalyǵy úshin kólik ınfraqurylymyn qamtamasyz etedi. Qurylystyń bastalýy 2026 jylǵa josparlanǵan, dep jazady Montsame.
Ulan-Batyr qalasy ákimdiginiń málimetinshe, jobany eń qarbalas Enhtaıvan dańǵyly boıymen júzege asyrý josparlanyp otyr. Onyń tehnıkalyq-ekonomıkalyq negizdemesi men kontseptsııasyn ázirleý jumystary aıaqtalǵan. Qorshaǵan ortaǵa jáne áleýmettik salaǵa áserin baǵalaý (ESIA) «Inojen» koreı kompanııasy men «Eko Natýr» mońǵol kompanııasy tarapynan birlesip júrgizilip jatyr. Onyń jumysy jeltoqsan aıynda aıaqtalady dep kútiledi..
Ulan-Batyrda kún saıyn batys pen shyǵys arasynda orta eseppen 347 myń kólik qozǵalady. Eń qarbalas ýaqytta jol júrý ýaqyty ortasha eseppen 3-4 saǵatty quraıdy. Bul úlken ekonomıkalyq shyǵyndarǵa, onyń ishinde jumysqa keshigý, otyn shyǵyny jáne qoǵamdyq narazylyqtarǵa ákeledi.
Qala ákimi Hıshgeegıın Nıambaatar metro qurylysy jobasy úshin irikteý protsesiniń halyqaralyq deńgeıde jarııalanǵanyn atap ótti.
— Qorytyndy irikteý 15 jeltoqsanǵa josparlanǵan, alǵashqy usynystardy tapsyrǵan 27 zańdy tulǵa arasynan tańdaý jasalady. Bul iri joba halyqaralyq standarttarǵa saı josparlanyp otyr, al onyń bıýdjeti ulǵaıyp keledi. Kelesi aptada Ulan-Batyrda tramvaı qurylysy jobasynyń tórtinshi kezeńi bastalady, — dep qosty ákim.
Metronyń paıdalanýǵa berilýi qala ekologııasyna oń áser etip, aýa sapasyn jaqsartyp, halyqtyń densaýlyǵyn qorǵaýǵa yqpal etedi.
Metro stantsııalarynyń mańynda saýda-servıstik ortalyqtar salynady. Bul qala ekonomıkasyna tıimdilik ákelip, turǵyndarǵa metro arqyly 15 mınýtta jetýdi qamtamasyz etedi, bul avtobýstarmen júrýge jumsalatyn 45 mınýtty únemdeýge múmkindik beredi. Sonymen qatar, bul shaǵyn jáne orta bızneske, stantsııaǵa jaqyn ornalasqan kásiporyndarǵa qoldaý kórsetedi.
Sarapshylardyń baǵalaýy boıynsha, ár stantsııada orta eseppen 10 shaǵyn jáne orta bıznes ókili paıda kóredi, al jalpy alǵanda búkil stantsııa boıynsha 150-200 shaǵyn jáne orta bıznes ókili jumys isteıdi. Sondaı-aq, metro stantsııalaryna jaqyn ınfraqurylymdy damytý sharalary shamamen 150 myń jańa jumys ornyn qurýǵa múmkindik beredi.
Budan buryn Mońǵolııa alǵash ret ıÝNESKO Álemdik mura komıtetine saılanǵanyn jazǵanbyz.