2026 jyly Sý resýrstarynyń ulttyq aqparattyq júıesi iske qosylady
ASTANA. KAZINFORM — Aqparattyq júıeni engizý nátıjesinde jerústi jáne jerasty sý resýrstaryn esepke alý jáne basqarý úshin biryńǵaı tsıfrlyq platforma qurylady, dep habarlaıdy Sý resýrstary jáne ırrıgatsııa mınıstrligi.
Memleket basshysynyń Qazaqstan halqyna Joldaýynda berilgen tapsyrmasyn oryndaý maqsatynda Sý resýrstary jáne ırrıgatsııa mınıstrligi Sý resýrstarynyń ulttyq aqparattyq júıesin ázirlep jatyr.
Júıede jerústi jáne jerasty sýy, gıdrotehnıkalyq qurylysjaılar men ózge de sý sharýashylyǵy nysandary týraly málimetter jınaqtalady. Bolashaqta jasandy ıntellekt pen ǵaryshtyq monıtorıng derekterin qoldaný josparlanyp otyr. Bul eldiń sý balansyn, ekonomıka men azamattardyń sýǵa degen naqty qajettiligin anyqtaýǵa, sý resýrstaryn paıdalanýdy taldaýǵa jáne baqylaýǵa múmkindik beredi.
Aqparattyq júıeni engizý nátıjesinde jerústi jáne jerasty sý resýrstaryn esepke alý jáne basqarý úshin biryńǵaı tsıfrlyq platforma qurylady. Bul memlekettik júıelermen ıntegratsııalaý arqyly málimetterdiń qaıtalanýyn joıyp, sýdy paıdalanýdaǵy ashyqtyq pen tıimdilikti arttyrady, sondaı-aq sý tapshylyǵy men tótenshe jaǵdaılarmen tıimdi kúresýge múmkindik beredi. Platforma Eýrazııalyq damý bankiniń granttyq qarajaty esebinen ázirlenip jatyr. Jobany iske qosý 2026 jyldyń sońyna deıin josparlanǵan.
Qazir mınıstrliktiń Sý resýrstary aqparattyq-taldaý ortalyǵy basseın ınspektsııalary men «Qazsýshar» qyzmetkerlerine júıemen jumys isteý jóninde oqý semınarlaryn ótkizip jatyr. Sý resýrstary jáne ırrıgatsııa mınıstri Nurjan Nurjigitov vedomstvoǵa qaraıtyn uıymdardyń basshylaryna Sý resýrstarynyń ulttyq aqparattyq júıesine engiziletin derekterdiń dáldigi men ózektiligin qatań qadaǵalaýdy tapsyrdy.
— Qazirdiń ózinde aýqymdy jumys atqaryldy. 2026 jyly júıeni iske qosýymyz qajet. Árbir azamat sý resýrstarynyń jaǵdaıy týraly qajetti aqparatty osy júıeden ala alýy tıis. Ol úshin kúndelikti júıeli jumys júrgizilýi kerek. «Qazsýshar» men basseın ınspektsııalary mamandary engizetin málimetter naqty bolýy shart. Bul máselege barynsha jaýapkershilikpen qaraý qajet, — dedi Sý resýrstary jáne ırrıgatsııa mınıstri Nurjan Nurjigitov.
Osyǵan deıin Sý resýrstary mınıstrligi qurylǵaly 1800-den astam sý mamany turaqty jumyspen qamtylǵanyn jazǵan edik.