2026 jyly Smart Turmys biryńǵaı kommýnaldyq qyzmet platformasy iske qosylady

ASTANA. KAZINFORM — Qazaqstanda «Smart Turmys» biryńǵaı tsıfrlyq servısi quryldy, onda sý, jylý, elektr, gazben jabdyqtaý jáne qaldyqtardy shyǵarý qyzmetteri «bir terezede» biriktirilgen. Turǵyn úı-kommýnaldyq sharýashylyq salasyn tsıfrlandyrý týraly Prezıdent tapsyrmasyn oryndaý jóninde Ónerkásip jáne qurylys vıtse-mınıstri Jánnat Dúbirova aıtyp berdi. 

Spıkerdiń aıtýynsha, platforma turǵyndardyń kommýnaldyq qyzmettermen ózara áreketin jeńildetip, barlyq protsesterdi ashyq etedi jáne ártúrli organdarǵa júginý qajettiligin azaıtady.

— Joba beıindi memlekettik organdarmen birlesip iske asyrylyp jatyr. Tsıfrlandyrý jaı ǵana formaldy emes, naqty jumys isteýi úshin TKSh protsesterine reınjınırıng júrgizildi, — dedi Jánnat Dúbirova Kongress ortalyqta ótken eseptik kezdesýde.

Sonymen birge, «Energetıkalyq jáne kommýnaldyq sektorlardy jańǵyrtý» ulttyq jobasy sheńberinde bıyl qarasha aıynda satyp alý rásimderin tolyq tsıfrlyq formatqa kóshirýge múmkindik beretin elektrondyq platforma iske qosyldy. Endi tabıǵı monopolııalar sýbektileri ótinimderin onlaın bere alady, al olardy qaraý men kelisýdiń barlyq kezeńi jedel jáne ashyq júrgiziledi.

— Qazir ulttyq jobaǵa qatysatyn barlyq kommýnaldyq kásiporyndar meks.zakup.sk.kz platformasynda tirkelgen. Qazirdiń ózinde 50 kásiporynnan jalpy somasy jarty trıllıon teńgege jýyqtaıtyn 166 joba usynyldy. Oǵan qosa, platforma qajettilikterdi aldyn ala qalyptastyrýǵa múmkindik beredi: 2026 jylǵa arnalǵan satyp alýlar men ulttyq jobany júzege asyrýǵa daıyn 209 EPC-merdiger men otandyq óndirýshilerdiń tizimi jasaqtaldy, — dedi J. Dúbirova.

Buǵan deıin Ónerkásip jáne qurylys vıtse-mınıstri drondar men JI zańsyz qurylys nysandaryn anyqtaıtynyn habarlaǵan edi.

Sondaı-aq, jer qoınaýyn paıdalaný tolyq tsıfrlandyryldy: 22 memlekettik qyzmet onlaın kórsetile bastady.